08.06.2026 | 03:37
ՀՀ-ն պատրաստ չէ լինել ԵՄ անդամ, մեր նպատակը ԵՄ ստանդարտներին համապատասխանելն է․ Փաշինյան․ ՏԵՍԱՆՅՈՒԹ
Էրդողանն ասել է, որ Թուրքիան կոնկրետ առաջարկներ չի ստացել ՆԱՏՕ-ին Շվեդիայի և Ֆինլանդիայի միանալու հարցում թուրքական պահանջների մասով
Քաղաքականություն
01.06.2022 | 17:07
Թուրքիան նախկինի պես որևէ կոնկրետ առաջարկ չի ստացել ՆԱՏՕ-ին Շվեդիայի և Ֆինլանդիայի անդամակցության հարցում իր մտահոգությունները կարգավորելու համար։ Այս մասին հայտարարել է Թուրքիայի նախագահ Ռեջեփ Թայիփ Էրդողանը խորհրդարանում ունեցած ելույթում, գրում է ՏԱՍՍ-ը։
«Մենք բացահայտ հայտարարել ենք, որ դեմ ենք ՆԱՏՕ-ին այդ երկրների անդամակցությանը՝ ահաբեկչական Քուրդիստանի աշխատավորական կուսակցությանն ու նրա ճյուղերին աջակցության պատճառով։ ՆԱՏՕ-ն անվտանգային կազմակերպություն է, և ոչ թե ահաբեկչական կազմակերպությունների աջակցման կառույց։ Նրանք պաշտպանում են այդ ահաբեկչական կազմակերպություններին Շվեդիայի, Ֆինլանդիայի, Գերմանիայի, Ֆրանսիայի և Նիդերլանդների ոստիկանության հետ միասին։ Նրանք երթ են անում ահաբեկչական կազմակերպությունների առաջնորդներին պատկերող պաստառներով։ Մեզ դեռ որևէ կոնկրետ փաստաթուղթ չեն ներկայացրել։ Մենք չենք կարող հավատալ խոսքերին, որոնք չեն ամրագրվի փաստաթղթերում»,- ասել է Էրդողանը։
Հավելենք՝ նախօրեին էլ Թուրքիայի ԱԳ նախարար Մևլութ Չավուշօղլուն հայտարարել էր, որ Շվեդիայից և Ֆինլանդիայից գրավոր երաշխիքներ են պահանջում ՆԱՏՕ-ին՝ նրանց անդամակցությանը համաձայնելու համար։
Էմմա Չոբանյան
