Խերսոնում ու Զապորոժիեում սկսել են ռուսական անձնագրեր տրամադրել

Ռուսաստանի կողմից գրավված Ուկրաինայի Խերսոնի և Զապորոժիեի շրջաններում սկսվել է ռուսական անձնագրերի տրամադրման արագացված ընթացակարգ։ Ռուսաստանի փոխվարչապետ Մարատ Խուսնուլինը հայտնել է, որանձնագրերի տրամադրումը սկսվել է նախօրեին։ Նա նշել է, որ անձնագրերի համար դիմել է ավելի քան 50 մարդ, գրում է DW-ի ռուսական ծառայությունը։

Մինչ ռուսական ներխուժումը Խերսոնի մարզում ապրում էր ավելի քան 1 մլն մարդ, իսկ Զապորոժիեի շրջանում՝ ավելի քան 1,6 մլն մարդ։

Նախօրեին Զապորոժիեի Մելիտոպոլ քաղաքում բացվել է Ռուսաստանի Դաշնային միգրացիոն ծառայության առաջին ստորաբաժանումը։ Ռուսական անձնագրերի տրամադրման «պարզեցված ընթացակարգը» չի ենթադրում Ուկրաինայի քաղաքացիությունից հրաժարում, «Ինտերֆաքս»-ին հայտնել են Ռուսաստանի կողմից նշանակված քաղաքային վարչությունում։

Ռուսական իշխանությունների կողմից նշանակված Զապորոժիեի շրջանի «ռազմական-քաղաքացիական վարչակազմի գլխավոր խորհրդի» անդամ Վլադիմիր Ռոգովն ավելի վաղ ասել էր, որ տարածաշրջանը «ճանապարհ կբռնի դեպի Ռուսաստանի մաս դառնալը»։

«Զապորոժիեի շրջանի համար կարող է լինել միայն մեկ ապագա՝ այն պետք է լինի Ռուսաստանի կազմում, դառնա Ռուսաստանի Դաշնության լիիրավ սուբյեկտը»,- հայտարարել է Ռոգովը։

Այս մասին խոսել է նաև Ռուսաստանի կողմից Խերսոնի շրջանի «ռազմաքաղաքացիական վարչակազմի ղեկավարի տեղակալ» նշանակված Կիրիլ Ստրեմուսովը։

Հիշեցնենք՝ մայիսի 25-ին ՌԴ նախագահ Վլադիմիր Պուտինը հրամանագիր է ստորագրել Զապորոժիեի և Խերսոնի շրջանների բնակիչներին պարզեցված ընթացակարգով ՌԴ քաղաքացիություն տրամադրելու մասին։

Տաթև Ֆռանգյան