03.05.2024 | 23:30
Ինչու Էրդողանի Սպիտակ տուն այցը հիմա տեղի չի ունենա. անդրադարձ
Նավթի մասնակի էմբարգո, «Սբերբանկի» անջատում SWIFT-ից․ նոր պատժամիջոցներ Ռուսաստանի դեմ
Քաղաքականություն
31.05.2022 | 11:31
ԵՄ առաջնորդները երկուշաբթի ուշ երեկոյան համաձայնեցրել են Ռուսաստանի դեմ պատժամիջոցների վեցերորդ փաթեթը, որը նախատեսում է մասնակի էմբարգո ռուսական նավթի ներկրման վրա և «Սբերբանկի» անջատում SWIFT համակարգից, գրում է BBC-ի ռուսական ծառայությունը։
«ԵՄ ռուսական նավթի արտահանումն արգելելու մասին համաձայնագիրն ընդգրկում է Ռուսաստանի նավթի ներմուծման ավելի քան երկու երրորդի կրճատում, ինչը ռազմական մեքենայի ֆինանսավորման ամենամեծ աղբյուրն է: Սա առավելագույն ճնշում է Ռուսաստանի վրա՝ պատերազմը դադարեցնելու համար», – թվիթերում գրել է Եվրոպական խորհրդի նախագահ Շառլ Միշելը:
Էմբարգոն վերաբերում է ծովով առաքվող նավթին։ ԵՄ-ն որոշել է առայժմ թողնել ներմուծումը «Դրուժբա» խողովակաշարով, որից կախված է Հունգարիան։ Հենց այս երկիրն էր դեմ Ռուսաստանի նկատմամբ նավթի լիակատար էմբարգոյի ներդրմանը։
Շառլ Միշելը ամփոփիչ ասուլիսում ասել է, որ խողովակաշարերով ռուսական նավթի ներկրումը թողնելու որոշումը ժամանակավոր է։
ԵՄ առաջնորդները նաև պայմանավորվել են անջատել ռուսական խոշորագույն բանկը՝ «Սբերբանկը», SWIFT միջբանկային վճարումների համակարգից և արգելել ռուսական ևս երեք պետական լրատվամիջոցների գործունեությունը ԵՄ տարածքում։
Եվրահանձնաժողովի ղեկավար Ուրսուլա ֆոն դեր Լեյենը, որը պատժամիջոցների վեցերորդ փուլի նախաձեռնողն էր, երկուշաբթի երեկոյան ասել է, որ Եվրամիությունը հույս ունի մինչև տարեվերջ հրաժարվել ռուսական նավթի 90%-ից։
Նա նաև ասել է, որ բանակցություններից հետո ԵՄ-ն աշխատում է Ուկրաինային 9 միլիարդ եվրոյի օգնություն տրամադրելու ուղղությամբ՝ իր ընթացիկ իրացվելիության կարիքները հոգալու համար:
Տաթև Ֆռանգյան
