22.04.2026 | 21:01
Մարտին Պողոսյանը՝ ծանրամարտի Եվրոպայի առաջնության բրոնզե մեդալակիր
Արդարադատության նախարարության և ԱԺ-ի համակարգմամբ տեղի է ունեցել համաժողով
Քաղաքականություն
30.05.2022 | 21:34
Տեղի է ունեցել Քրեակատարողական նոր օրենսգրքի նախագծի քննարկմանը նվիրված համաժողով՝ գործադիր, օրենսդիր և դատական իշխանության, ինչպես նաև Դատախազության, Փաստաբանների պալատի և Մարդու իրավունքների պաշտպանի ներկայացուցիչների միջև:
Քննարկումը հատկապես կարևորվել է այն առումով, որ 2022 թվականի հուլիսի 1-ից նախատեսվում է համատեղ կիրառել Քրեական, Քրեական դատավարության և Քրեակատարողական նոր օրենսգրքերը:
Համաժողովի շրջանակներում Արդարադատության փոխնախարար Արփինե Սարգսյանն ընդգծել է, որ նոր օրենսգիրքը հիմնված է դատապարտյալների նկատմամբ անհատականացված պատժի կրման սկզբունքների վրա, ինչպես նաև՝ կարևորել որդեգրված գաղափարախոսությունն իրապես հուլիսի 1-ից իրավակիրառ պրակտիկայում ունենալու հանգամանքը:
Ազգային ժողովի պետական-իրավական հանձնաժողովի նախագահ Վլադիմիր Վարդանյանը ողջունել է համաժողովի ընտրված ձևաչափը և ընդգծել քրեական ենթամշակույթի դեմ պայքարի կարևորությունը, ինչպես քրեակատարողական հիմնարկների ներսում, այնպես էլ հասարակության շրջանակներում՝ քրեական ենթամշակույթի նկատմամբ զրո հանդուրժողականություն ապահովելու և այն արմատախիլ անելու տեսանկյունից:
Նիստի ավարտին պայմանավորվածություն է ձեռք բերվել համատեղ դիտարկելու Քրեակատարողական նոր օրենսգրքի նախագծի վերաբերյալ հնչած բոլոր նկատառումները, որոնք կօգնեն բարելավելու օրենսգիրքը:
Համաժողովն անցկացվել է Ազգային ժողովի պետական-իրավական հանձնաժողովի աջակցությամբ՝ ՄԱԿ-ի զարգացման «Նոր Հայաստան՝ ժամանակակից խորհրդարան» ծրագրի շրջանակներում:
