Քաղաքականություն
26.05.2022 | 21:02Արևմուտքը՝ ԵՄ-ն և ԱՄՆ-ն, այս պահին ակտիվ են Հայաստանի և Ադրբեջանի միջև հարաբերությունների կարգավորման, խաղաղության պայմանագրի շուրջ բանակցությունների պրոցեսում։ Մոսկվան է սուր արձագանքում ՌԴ ԱԳՆ խոսնակ Մարիա Զախարովայի շուրթերով, թե ԵՄ-ն համառ միջամտում է եռակողմ համաձայնագրերի կատարման ընթացքին։
ԵՄ-ին ՌԴ-ն մեղադրել է աշխարհաքաղաքական խաղեր տալու մեջ, ինչը, իբր, Մոսկվան չի ուզում։ Պատերազմից հետո մինչև վերջերս ՌԴ-ն էր պրոցեսը ղեկավարում, բայց սահմանազատման հանձնաժողովի նիստ չկար, ապաշրջափակման հարցում չէին համաձայնեցվում պարամետրերը, ի վերջո, Ադրբեջանը ներխուժում էր, գերեվարում, կրակում։ Հիմա դա, կարծես, չկա։ Factor TV-ի հարցազրույցում Լոնդոնում գործող Ռուսաստանի և ԱՊՀ հարցերով IHS հետազոտական կենտրոնի ավագ վերլուծաբան Լիլիթ Գևորգյանն ասում է, որ Ռուսաստանի ուղերձն ուղղված է Ադրբեջանին։
«Այն, ինչ Հայաստանի կառավարությունն է կատարում 2020-ի նոյեմբերի 9-ից հետո, շարունակությունն է այն գծի, որ Փաշինյանի կառավարությունն ընդունեց և փորձում է իրականացնել։ Այն փաստաթղթերը և պրոցեսները տարվել են բրյուսելյան հարթակ, ծնվել են Ռուսաստանում և համաձայնեցվել են նրա հետ բանակցություններում և միջնորդությամբ»,- ասում է փորձագետը։
Ինչպիսի՞ քաղաքականություն պետք է տաներ Հայաստանի կառավարությունը և ինչպիսի՞ն է այսօրվա գործելակերպը։
«Ուժի միջոցով կոնֆլիկտը լուծելու՝ Ադրբեջանի քայլը խիստ դատապարտելի է միջազգային իրավունքի առումով, և այն հնարավոր չէր անել առանց Ռուսաստանի «օրհնանքի»։ Եթե խնդիրն ուժի միջոցով է լուծվում և Մինսկի խմբում խաղաղ բանակցություններն ի չիք են դառնում, ՀՀ-ի և Արցախի շահերից է բխում պրոցեսը վերականգնել հենց Մինսկի խմբում։ Ամենաֆունդամենտալ հարցն է՝ վերանայել այն ռուսակենտրոն քաղաքականությունը, որը, ի վերջո, չկարողացավ կանխել պատերազմը, որը հանգեցրեց ոչ միայն Արցախի կորստի, այլև Հայաստանի տարածքային ամբողջականության խախտմանը և անվտանգային խնդիրների»,- նշում է Լիլիթ Գևորգյանը։
Հարցազրույցն ամբողջությամբ՝ տեսանյութում։
Ռոբերտ Անանյան
