20.08.2026 | 18:19
Ուելսցի մրցավարը ռեկորդակիր է դարձել 63-ամյա կարիերայի շնորհիվ․ ԼՈՒՍԱՆԿԱՐ
Շվեդիայի վարչապետը հայտնել է ՆԱՏՕ-ին երկրի անդամակցության ժամկետները
Քաղաքականություն
16.05.2022 | 14:25
Շվեդիայի՝ ՆԱՏՕ-ին անդամակցելու գործընթացը կարող է տևել մոտ մեկ տարի։ Այս մասին հայտարարել է երկրի վարչապետ Մագդալենա Անդերսոնը, փոխանցում է korrespondent-ը։
Նրա խոսքով՝ լիիրավ անդամակցության գործընթացը կարող է տևել մոտ մեկ տարի, և իշխանությունները պատրաստ են, որ այդ ճանապարհին կարող են որոշակի դժվարություններ առաջանալ, ինչպես, օրինակ, Թուրքիայի արդեն իսկ արտահայտած դիրքորոշումն է։
«Մենք դա տեսել ենք նախկինում ևս ու պատրաստ ենք դրան։ Մենք երկխոսություն կունենանք բոլոր անդամ երկրների, այդ թվում՝ Թուրքիայի հետ տարբեր մակարդակներում»,- ասել է վարչապետը։
Անդերսոնը նշել է, որ ՆԱՏՕ-ին անդամակցելով՝ Շվեդիան կարող է չհրաժարվել իր համար սկզբունքային դիրքորոշումներից։
«Մենք կարող ենք անել նույն հայտարարությունները, ինչ ժամանակին արեցին Նորվեգիան և Դանիան, որ իրենք չեն ցանկանում իրենց տարածքում մշտական ռազմակայաններ և միջուկային զենք տեղակայել»,- ասել է վարչապետը՝ մանրամասնելով, որ նկատի ունի խաղաղ ժամանակներում ռազմակայանները։
Նախօրեին հաղորդվել էր, որ Շվեդիան պաշտոնապես որոշել է դիմել Հյուսիսատլանտյան դաշինքին անդամակցելու համար։
Ավելի վաղ ՆԱՏՕ-ին դիմելու որոշում էր կայացրել նաև Ֆինլանդիան։
Տաթև Ֆռանգյան
