Էն իշխանությունը, որ հոտառությունը կորցրեց, ով ուզում է լինի՝ դա անուն-ազգանունի, կուսակցության խնդիր չի, տապալված է Հայաստանում. Փաշինյանը՝ Գևորգ Պետրոսյանին

ԱԺ «Ծառուկյան» խմբակցության պատգամավոր Գևորգ Պետրոսյանը ԱԺ հատուկ նիստում հարց ուղղեց ՀՀ վարչապետի միակ թեկնածու Նիկոլ Փաշինյանին.

«Շատ լավ գիտեք, որ Հայաստանում բնակչության սոցիալական վիճակը աղետալի է, արտագաղթը շարունակվում է ու դրան նպաստող պատճառների շարքում առանձնակի տեղ ունեն հանրապետությունում իրականացվող հարկային տեռորը, մաքսային տեռորը և ամենակարևորը արդարության բացակայության և արդարադատության անմատչելիության մթնոլտը: Այն, որ Ձեզ ժողովուրդը հավատում է, դրա անվիճելի ապացույցն այն է, որ Դուք հիմա այդտեղ եք կանգնած: Բայց պետք են երաշխիքներ: Արդյոք հույս ունենա՞նք, որ Ձեր ընտրվելու դեպքում, մենք այլևս չենք ապրելու այն Հայաստանում, որտեղ մարդը ամենացածր արժեքն է»:

 Փաշինյանը պատասխանեց. «Եթե նկատեցիք, ես տեղի ունեցող քաղաքական պրոցեսների ամենամեծ և կարևոր պահանջը համարեցի արդար Հայաստանը: Եվ համամիտ եմ, որ այն ամենաօրախնդիր խնդիրներից մեկն է: Մենք այսօր պայքարում ենք մարդկանց հիասթափության դեմ: Պատկերացնո՞ւմ եք ինչպիսին կլլինի մարդկանց հիասթափությունը, եթե հանկարծ այս փոփոխություններից հետո պարզվի, որ Ձեր ասած բոլոր արատավոր երևույթները կամ նրանցից մի մասը շարունակում են գոյություն ունենալ: Մենք հիմա ունենք ամենակարևոր երաշխիքը, և այդ երաշխիքը այս դահլիճում չէ, Հանրապետության հարպարակում  կանգնած ժողովուրդն է: Վերջ Հայաստանում իշխանության տերը ժողովուրդն է: Էն իշխանությունը, որ հոտառությունը կորցրեց, ով ուզում է լինի, դա անուն-ազգանունի, կուսակցության խնդիր չի, տապալված է Հայաստանում, ամենամեծ երաշխիքը դա է»: