Պաշտոնական կողմին անհրաժեշտ է, որ մեղադրանքը չհասկացված լինի. դատախազ. ՏԵՍԱՆՅՈՒԹ

«Ինչքան էլ բացատրվի, այս մեղադրանքը հասկանալի չի լինելու, քանի որ պետք է, որ այն հասկանալի չլինի»,-Երևան քաղաքի ընդհանուր իրավասության դատարանում՝ դատավոր Աննա Դանիբեկյանի նախագահությամբ ընթացող ՀՀ երկրորդ նախագահ Ռոբերտ Քոչարյանի և Արմեն Գևորգյանի գործով դատական նիստի ընթացքում, անդրադառնալով Ռոբերտ Քոչարյանի պաշտպան Հովհաննես Խուդոյանի միջնորդությանը, հայտարարեց մեղադրող դատախազ Գևորգ Բաղդասարյանը:

Ըստ նրա՝ պաշտպանական կողմի ներկայացրած միջնորդությունները ծառայում վաղուց սկսած ոչ դատավարական նպատակի:

«Այդ հայտարարությունների միջոցով փորձում են նախորդ դատական նիստերին տեղի ունեցածով տպավորություն ստեղծել, թե բոլորն ընդունել են, որ մեղադրանքն անորոշ է: Մեղադրանքի որոշակիությունն արդար դատաքննության իրավունքի կարևոր իրավունքներից մեկն է: Մեղադրանքը պարզաբանված լինելու իրավունքը չի կարող անսահմանափակ լինել, քանի որ «մեղադրանքը պարզ չէ» արտահայտությունը կարող է արվել անգամ այն ժամանակ, երբ մեղադրանքը պարզ է»:

Անդրադառնալով մեղադրանքին՝ մեղադրող դատախազն ասաց. «Կարծում եմ՝ պարզ է մեղադրանքը՝ կաշառք տալու հանցակազմը, որը 311 հոդվածով ձևակերպված է: Մեղադրանքում գրված է՝ որ պաշտոնատար անձը, որ դիրքն օգտագործելով, ինչին օժանդակելու նպատակի համար, ինչ է ստացել:

Ինքնաբացարկը, որը ևս արդար դատաքննության տարրերից է, դրա մակարդակը չի կարելի այդ աստիճան իջեցնել:

Նույնն էլ մեղադրանքի հարցերը քննարկելը: Ձևակերպել, թե մեղադրանքը հասկանալի չէ, քանի որ գրված է՝ այսքան գումար է տրվել Ռոբերտ Քոչարյանին, ոչ թե գրված է, որ ինքն է ստացել», լուրջ չէ»:

Ըստ Գևորգ Բաղդասարյանի՝ եթե ամեն ինչ այդքան պարզ լիներ, ցանկացած դատական գործ դատարան մտնելուց հինգ րոպե հետո կկարճվեր, քանի որ կպատճառաբանվեր, որ մեղադրանքը պարզ չէ:

Մանրամասները՝ տեսանյութում: