Ալիևը սպառնացել է՝ Բաքուն կարող է չճանաչել Հայաստանի տարածքային ամբողջականությունը, նաև ՀՀ-ին տարածքային պահանջներ ներկայացրել

Ադրբեջանի նախագահ Իլհամ Ալիևը կրկին սպառնացել է Հայաստանին և Արցախին։ Ադրբեջանական լրատվամիջոցների փոխանցմամբ՝ Արցախի գրավյալ Շուշի քաղաքում անցկացվող աշխարհի ադրբեջանցիների 5-րդ համագումարին ունեցած ելույթում նա հայտարարել է, որ Ադրբեջանն ու Հայաստանն առաջիկայում պետք է կոնկրետ բանակցություններ սկսեն խաղաղության համաձայնագրի շուրջ, և դա պետք է լինի «միայն ադրբեջանական կողմի պայմաններին համապատասխան»։

«Մենք մտադիր ենք բանակցություններ վարել Հայաստանի հետ խաղաղության համաձայնագրի շուրջ միայն մեր առաջարկած 5 հիմնարար սկզբունքների շուրջ։ Ներկայում երկու երկրների ԱԳՆ-ները զբաղվում են աշխատանքային խմբերի ձևավորմամբ։ Կարծում եմ, որ առաջիկայում պետք է հստակ բանակցությունների անցնել, և այդ բանակցությունները չպետք է չափազանց երկար վարել, քանի որ խաղաղության պայմանագիրը կնքվելու է միայն 5 հիմնարար սկզբունքների հիման վրա»,- ասել է Ալիևը։

Նա նշել է, թե Հայաստանը պետք է պաշտոնապես ճանաչի Ադրբեջանի տարածքային ամբողջականությունը և բացառի Ադրբեջանի նկատմամբ տարածքային պահանջները։

«Հայաստանում գլուխ բարձրացնող ռևանշիստական ուժերը պետք է իմանան, որ Հայաստանի համար միակ ելքն է, կարելի է ասել՝ միակ հնարավորությունը։ Եթե նրանք սա մերժեն, ապա մենք էլ չենք ճանաչի Հայաստանի տարածքային ամբողջականությունը, այդ մասին պաշտոնապես կհայտարարենք»,- սպառնացել է Ալիևը։

Նա նշել է, թե հետագայում ձեռնարկվելիք ջանքերի շնորհիվ նաև «վերացնելու են Հայաստանի և աշխարհի հայության տարածքային պահանջները» Ադրբեջանի նկատմամբ։

Ադրբեջանի նախագահը շարունակել է զբաղվել պատմության կեղծմամբ՝ կրկին տարածքային պահանջներ ներկայացնելով Հայաստանին։ Նա հայտարարել է, թե խորհրդային իշխանությունները, իբր, «Զանգեզուրը  անջատել են Ադրբեջանից և տվել Հայաստանին»։

Էմմա Չոբանյան