Կոռուպցիոն ռիսկ. ինչո՞ւ է 1,5 մլն դոլարի գնումը կատարվում մեկ անձից․ ՏԵՍԱՆՅՈՒԹ

Կոռուպցիայի դեմ պայքարում զրո անհանդուրժողականության մասին մշտապես հայտարարող Նիկոլ Փաշինյանի կառավարությունն այսօր մեկ անձից կատարվող գնման ընթացակարգով 750 մլն դրամ հատկացրեց «Ֆակտորի Փրադաքշն» ՍՊԸ-ին: 1,5 միլիոն դոլարն այս ընկերությանը տրվում է ընդամենը տասը օրվա համար՝ մայիսի 21-31-ը Երևանում բռնցքամարտի մեծահասակների Եվրոպայի առաջնությունը կազմակերպելու նպատակով:

Այն, որ բռնցքամարտի առաջնությունը Հայաստանում է անցկացվելու, հայտնի էր դեռ կես տարի առաջ: ԿԳՄՍ նախարարի տեղակալ Կարեն Գիլոյանն այս մասին հայտնել էր անցած տարվա հոկտեմբերի 13-ին հրավիրված մամուլի ասուլիսի ժամանակ: Չնայած այս հանգամանքին՝ նախարարությունն ու կառավարությունն այս վեց ամիսների ընթացքում մրցույթ չեն հայտարարել, փոխարենը 1,5 միլիոն դոլարի ծառայությունները որոշել են մեկ անձից կատարվող գնման ընթացակարգով ձեռք բերել:

Factor TV-ի հարցին՝ ինչո՞ւ կես տարվա ընթացքում գնման մրցույթ չեն հայտարարել, ԿԳՄՍ նախարար Վահրամ Դումանյանն այսպես է արձագանքում. «Մայիսին բուն մրցույթի մեկնարկն է, այդ ժամանակը, որ ասում եք նոյեմբերից մինչև մայիս, շատ փոքր ժամանակ է: Մենք չենք կարող մայիսի 1-ին նոր սկսել գործընթացները: Այստեղ լուրջ վտանգ կար, որ մենք չենք կարող հասցնել»։

ԹԻՀԿ ծրագրերի համակարգող Վարուժան Հոկտանյանը Վահրամ Դումանյանի արդարացումները տեղին չի համարում: Փորձագետը նշում է՝ վեց ամիսը բավականին մեծ ժամանակ էր բաց մրցույթ հայտարարելու համար:

Նիկոլ Փաշինյանն այսօր կառավարության նիստին հպանցիկ անդրադարձավ այս գնմանը և ընդամենը մեկ տողով նշեց, թե մինչև մեկ անձից գնում կատարելը՝ վեց ընկերության հետ քննարկել են միջացառման կազմակերպումը: Վարուժան Հոկտանյանը սա ձևական գործընթաց է համարում:

«Ֆակտորի Փրադաքշն»-ն առաջին անգամ չէ, որ առանց մրցույթի պետբյուջեի հաշվին հարյուրավոր միլիոնների ծառայություններ է մատուցում: Factor TV-ն ավելի վաղ հայտնել էր, որ 2017 թվականին հիմնադրված այս ընկերությունը հեղափոխությունից հետո միայն Երևանի քաղաքապետարանից՝ երեք տարում շուրջ 400 մլն դրամի ծառայությունների պատվեր է ստացել: 2019-ին Քաղաքացու օրվա միջոցառումների անցկացման համար կազմակերպությունը պետբյուջեից ստացել է 25 մլն դրամ, 2018-ին Ֆրանկոֆոնիայի գագաթնաժողովին նվիրված գալա համերգի կազմակերպման համար՝ 76 մլն դրամ, նույն թվականին անցկացված «Ընդդեմ ցեղասպանության հանցագործության» գլոբալ ֆորումի շրջանակում էլ 55 միլիոն դրամի ծառայություններ է մատուցել:

Իրավաբանական անձանց պետական ռեգիստրի տվյալների համաձայն՝ «Ֆակտորի Փրադաքշն»-ն ամբողջությամբ պատկանում է Ռուդիկ Տեր-Գալստյանին: Նա 2013-2017 թվականներին զբաղեցրել է Հանրային հեռուստաընկերության գլխավոր պրոդյուսերի պաշտոնը: 2020-ին էլ մասնակցել է գործադիր տնօրերի պաշտոնի համար հայտարարված մրցույթին:

Վարուժան Հոկտանյանը կոռուպցիոն ռիսկեր է տեսնում նույն կազմակերպությունից պարբերաբար հարյուր միլիոնավոր դրամների գնում կատարելու մեջ:

Իսկ ահա ԿԳՄՍ նախարարը հավաստիացնում է, թե առաջին անգամ է լսում «Ֆակտորի Փրադաքշն»-ի մասին, որին 1.5 մլն դոլար փոխանցելու նախագիծը հեղինակել ու բերել էր կառավարություն:

Պարզվում է՝ այսօր հատկացված 750 մլն դրամով չեն եզրափակվում բռնցքամարտի առաջնության ծախսերը: Կառավարությունը պետական բյուջեից 78 մլն դրամ էլ փետրվարին էր հատկացրել այս նպատակով: Վահրամ Դումանյանը նշում է՝ էլի են նախագիծ բերելու, որ միջոցառման համար գումարներ հատկացնեն:

Նշենք, որ պետական կառույցներն առանց մրցույթի գնումներ կատարում են «Գնումների մասին» ՀՀ օրենքի 23-րդ հոդվածի 1-ին մասի 2-րդ կետի համաձայն, եթե արտակարգ կամ չնախատեսված այլ իրավիճակի առաջացման հետևանքով ծագել է գնման անհետաձգելի պահանջ, ինչպես նաև այն դեպքերում, երբ կառավարությունն է նման որոշում կայացնում:

Մանրամասները՝ տեսանյութում։

Նարեկ Կիրակոսյան