15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Աքարը դրական է գնահատել ԱՄՆ-ից F-16 կործանիչների ձեռբերման շուրջ գործընթացը
Քաղաքականություն
13.04.2022 | 16:55
Թուրքիայի պաշտպանության նախարար Հուլուսի Աքարն անդրադարձել է ԱՄՆ-ից F-16 կործանիչների ձեռքբերման հարցին, փոխանցում է TRT Haber-ը։
Պատասխանելով F-16-երի գնման իրավիճակի շուրջ հարցին՝ Աքարն ասել է, որ Թուրքիային անհրաժեշտ է 70 F-16, սակայն ունեցածներն էլ պետք է արդիականացվեն։
«Դրա հետ կապված գործընթացը սկսել ենք «Օտարերկրյա ռազմական վաճառքի» շրջանակում, այն համակարգվում է ԱՄՆ Պաշտպանության նախարարության ու Պետքարտուղարության հետ»,- ասել է Աքարը։
Խոսելով ԱՄՆ Պետքարտուղարության կողմից Կոնգրեսին ուղղված նամակի մասին՝ Հուլուսի Աքարը նշել է․ «Նամակում կան որոշ դրական տարրեր, սակայն պետք է զգույշ լինել։ Սա երկար գործընթաց է, մենք հուսով ենք, որ այն դրական արդյունք կտա»։
Հավելենք, որ Կոնգրեսին ուղղված ԱՄՆ Պետքարտուղարության նամակում ասվում էր, որ Թուրքիային F-16 կործանիչների հնարավոր վաճառքը համապատասխանում է ԱՄՆ ազգային անվտանգության շահերին և կծառայի ՆԱՏՕ-ի երկարաժամկետ միասնությանը։
ԱՄՆ-ը, հիշեցնենք, պատժամիջոցներ է սահմանել Թուրքիայի պաշտպանական արդյունաբերության դեմ՝ ռուսական C-400 համակարգերի գնումից հետո։
Էմմա Չոբանյան
