16.01.2025 | 12:43
Գլենդելը վերադառնում է բնականոն գործունեության. քաղաքապետը մանրամասներ է հայտնում
Վրաստանը մասնակցում է Ռուսաստանի դեմ պատժամիջոցներին․ Զուրաբիշվիլի
Քաղաքականություն
01.04.2022 | 15:35
Վրաստանը մասնակցում է Ուկրաինայում պատերազմի պատճառով Արևմուտքի կողմից Ռուսաստանի դեմ սահմանված բոլոր միջազգային ֆինանսական պատժամիջոցներին։ Այս մասին հայտարարել է Վրաստանի նախագահ Սալոմե Զուրաբիշվիլին, գրում է Նովոստի Գրուզիան։
«Մենք մասնակցում ենք բոլոր միջազգային ֆինանսական պատժամիջոցներին, և դա ինչ-որ բան է նշանակում Վրաստանի ֆինանսական հատվածի համար։ Եվ մենք, միևնույն ժամանակ, մասնակցում ենք բոլոր այն բանաձևերին, որոնք ընդունվել են Ուկրաինային աջակցելու համար»,- Զուրաբիշվիլիի խոսքերն է մեջբերում լրատվական գործակալությունը։
Միաժամանակ, նա ընդգծել է, որ պատժամիջոցների հարցում Վրաստանի նախագահի և կառավարության դիրքորոշումների լուրջ տարբերությունների մասին խոսակցությունները չափազանցություն են։
«Տարբերությունը կարող է լինել այն բառապաշարի մեջ, որն օգտագործում է կառավարությունը»,- պարզաբանել է նա:
Վարչապետ Իրակլի Ղարիբաշվիլին ավելի վաղ հայտարարել էր, որ Վրաստանը չի միանա հակառուսական պատժամիջոցներին, քանի որ դա հակասում է երկրի ազգային շահերին և այդ քայլը չի կարող կանգնեցնել ռազմական գործողությունները Ուկրաինայում։ Սակայն իրականում, լինելով համաշխարհային ֆինանսական համակարգի մաս, Վրաստանը ստիպված էր մի շարք սահմանափակումներ մտցնել բանկային և ֆինանսական ոլորտում։
Տաթև Ֆռանգյան
