19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Տիգրան Ավինյանը՝ Երևանի քաղաքապետի ՔՊ-ի թեկնածու
31.03.2022 | 17:45
«Քաղաքացիական պայմանագիր» կուսակցության վարչության կողմից որոշում կա, որ Երևան քաղաքի առաջիկա ՏԻՄ ընտրություններում կուսակցության ցուցակը գլխավորելու է նախկին փոխվարչապետ Տիգրան Ավինյանը․ նա լինելու է իշխող ուժի քաղաքապետի թեկնածուն։ Այս մասին Factor.am-ի հետ զրույցում ասաց իշխող կուսակցության հանրային կապերի համակարգող Վահագն Ալեքսանյանը։ Ըստ նրա՝ Ավինյանն առաջիկայում կնշանակվի Երևանի փոխքաղաքապետ, ապա՝ կգլխավորի ընտրական ցուցակը։ Երևանի ավագանու ընտրություններն անցկացվելու են 2023 թվականին, իսկ մինչ այդ, թե երբ է Ավինյանը նշանակվելու փոխքաղաքապետ, հայտնի չէ։ «Եթե վարչությունը նման որոշում է կայացրել, ապա դա նշանակում է, որ Տիգրան Ավինյանը համաձայն է»,- ասաց Ալեքսանյանը։
Վերջինից հետաքրքրվեցինք՝ բացի Ավինյանից, քաղաքապետի այլ թեկնածուներ եղե՞լ են․ «Չեմ կարող նման մանրամասներ հայտնել, եթե նույնիսկ իմանայի էլ՝ չեմ կարծում, որ կոռեկտ կլիներ պատասխանել»։
Մեր ճշտող հարցին ի պատասխան Ալեքսանյանն ասաց, որ իշխող ուժը գործող քաղաքապետ Հրաչյա Սարգսյանի հետ որևէ տարաձայնություն չունի, ավելին՝ նրանք լավ հարաբերություններ ունեն․
«Տիգրան Ավինյանը մյուս ընտրությունների մեր քաղաքապետի թեկնածուն է, իսկ գործող քաղաքապետը՝ Հրաչյա Սարգսյանը, միանշանակ ունի «Քաղաքացիական պայմանագիր» կուսակցության ողջ թիմի աջակցությունը»,- նշեց Վահագն Ալեքսանյանը։
Արփի Հակոբյան
