19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Վրաստանի ԱԳՆ-ն անընդունելի է համարել Հարավային Օսիայի՝ ՌԴ կազմում ներառվելու վերաբերյալ հանրաքվեն
Քաղաքականություն
31.03.2022 | 14:53
Հանրաքվեն, որում Հարավային Օսիայի բնակիչները իրենց տեսակետը պետք է հայտնեն Ռուսաստանի Դաշնությանը միանալու հարցի շուրջ, կարող է անցկացվել մայիս-հունիսին։ ՏԱՍՍ-ի հետ զրույցում նման կարծիք է հայտնել Պետդումայի ԱՊՀ գործերով, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Վիկտոր Վոդոլացկին։
Նախօրեին Հարավային Օսիայի ղեկավար Անատոլի Բիբիլովը հայտարարել էր, որ երկիրը մոտ ապագայում իրավական քայլեր կձեռնարկի Ռուսաստանի Դաշնության կազմի մեջ մտնելու համար։ Երկրի ղեկավարի մամուլի քարտուղար Դինա Գասիևան ՏԱՍՍ-ին ասել է, որ ընթացակարգերը կավարտվեն ապրիլի 10-ին կայանալիք նախագահական ընտրություններից հետո։
«Կարծում եմ, որ ապրիլի 10-ին, երբ Հարավային Օսիայում կանցկացվեն հանրապետության նախագահի ընտրությունները, արդեն պարզ կլինեն հանրաքվեի անցկացման ժամկետները։ Նախագահի երդմնակալության ժամանակ նա կիրականացնի այս ընթացակարգը, կարծում եմ, որ շատ ժամանակ չի պահանջվի՝ մայիս-հունիսին»,- ասել է Վոդոլացկին։
Հարավային Օսիայում ՌԴ-ին միանալու շուրջ հանրաքվեի անցկացման լուրերին արձագանքել է Վրաստանի ԱԳՆ-ը՝ դա անընդունելի անվանելով։
«Իհարկե, հանրաքվե անցկացնելու մասին խոսակցությունն անընդունելի է այն պայմաններում, երբ Վրաստանի տարածքն օկուպացված է։ Այդ օկուպացումը ոչ միայն քաղաքական, այլև իրավական գնահատական ունի»,- հայտարարել է արտգործնախարար Դավիթ Զալկալիանին։
Իշխող «Վրացական երազանք» կուսակցության պատգամավոր Բեքա Դավիթուլիանիի խոսքով՝ Վրաստանը չի պատասխանի այս որոշմանը «ուժային մեթոդներով», սակայն այսօր հնարավորություն ունի «Վրաստանի օկուպացված տարածքների հետ կապված նման քայլերին պատասխանել «միջազգային լծակների միջոցով»։
Տաթև Ֆռանգյան
