Ինչո՞ւ ռուս խաղաղապահները չեն կրակում. Փաշինյանի առաջարկը Պուտինին անարձագանք է մնացել․ ՏԵՍԱՆՅՈւԹ

Ադրբեջանական զորքերը շարունակում են մնալ Քարագլուխ բարձունքում՝ նշանառության տակ պահելով Արցախի Փառուխ, Խրամորթ, Իվանյան, Ասկերան և այլ բնակավայրերը: Շփման գծում իրավիճակը շարունակում է լարված մնալ, հայտնում են Արցախի տեղեկատվական շտաբից՝ նշելով, որ հրադադարի էական խախտումներ չեն արձանագրվել: Պաշտոնական Ստեփանակերտն արդեն չորրորդ օրն է՝ չի հաստատում ՌԴ ՊՆ-ի մարտի 27-ին հայտնած այն տեղեկությունը, թե ադրբեջանական զինուժը դուրս է եկել Փառուխ համայնքից:

Սրան զուգահեռ՝ երեկ ռուսական խաղաղապահ առաքելությունը տեսանյութ է հրապարակել՝ որպես ապացույց, որ Փառուխ գյուղն իրենց վերահսկողության տակ է: Այնինչ, Արցախից բարձրաստիճան պաշտոնյան Factor TV-ի հետ զրույցում, անանունուն մնալու պայմանով,  ռուսական կողմի հրապարակած տեսանյութը տեղեկատվական շփոթմունք որակեց՝ շեշտելով, որ ադրբեջանական կողմը հասանելիություն ունի Քարագլուխ բարձունքին:

ԱԺ «Պատիվ ունեմ» խմբակցության քարտուղար Հայկ Մամիջանյանն էլ Factor TV-ի հետ զրույցում հայտնեց ադրբեջանական կողմի՝ դեպի բարձունք նոր ճանապարհները կառուցելու նախաձեռնության մասին:

Ստեփանակերտում բարձր մակարդակով, թեև ոչ հրապարակավ, բայց դժգոհություններ են հնչում, թե ինչպես ստացվեց, որ ռուսական կողմի վերահսկողության տակ գտնվող տարածքը հեշտությամբ անցավ թշնամուն: Արցախի մայրաքաղաքում վտանգավոր են համարում այն, որ այս նախադեպով «կանաչ լույս» է վառվում Ադրբեջանի համար:

Դեռ մարտի 25-ին Նիկոլ Փաշինյանը Վլադիմիր Պուտինի հետ հեռախոսազրույցում խոսել էր ռուս խաղաղապահների գործողությունների հետաքննության անհրաժեշտության մասին: Թե ինչ է պատասխանել ռուսական կողմը, հայտնի չէ: Այսօր Factor TV-ն փորձել է Մոսկվայի դիրքորոշման մասին տեղեկանալ վարչապետի աշխատակազմի ղեկավար Արայիկ Հարությունյանից, սակայն վերջինը հրաժարվել է թեմային անդրադառնալ:

Իսկ ահա ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանը շարունակում է առաջ տանել վարչապետի վերոնշյալ դիրքորոշումը: Ռուս խաղաղապահների արձագանքն ադրբեջանական ագրեսիային իշխանական խմբակցության պատգամավորը բավարար չի համարում:

Ինչո՞ւ ռուս խաղաղապահը չեն կրակում, երբ ադրբեջանցի դիպուկահարը սպանում է Արցախի խաղաղ բնակչի․ ՔՊ-ական պատգամավորն ակնարկում է՝ հրաման պետք է Պուտինը տա:

Պուտինի հետ ռուս խաղաղապահների գործողությունները հետաքննելու անհրաժեշտության մասին հրապարակավ խոսելը Հայաստանի ընդդիմությունն անթույլատրելի է համարում: «Պատիվ ունեմ» խմբակցության քարտուղար Հայկ Մամիջանյանի խոսքով՝ դա պետք է անել այնպես, որ Բաքուն չառիթավորվի: Արդյո՞ք թերացել են ռուս խաղաղապահները՝ հաշվի առնելով, որ ադրբեջանական զորքը մտել է Փառուխ և գրավել ստրատեգիական նշանակության Քարագլուխ բարձունքը. Հայկ Մամիջանյանը խուսափում է պատասխանել՝ նշելով, թե պաշտոնական տեղեկություններ չկան:

Խորհրդարանում իշխանության և ընդդիմության ներկայացուցիչները մեկ հարցում են համակարծիք՝ ռուս խաղաղապահների փոխարեն միջազգային կարգավիճակ ունեցող խաղաղապահների անհրաժեշտություն Արցախում չկա: Արմեն Խաչատրյանն ասում է՝ պետք է միայն ռուս խաղաղապահներին միջազգային մանդատով օժտել:

Ռուս խաղաղապահների անգործությունն Արցախում կասկածի տակ է դնում ռուսական խաղաղապահ առաքելության արդյունավետությունն ընդհանրապես: Փորձագետների կարծիքով՝ եթե առաջիկայում Ռուսաստանը փորձի խաղաղապահներ տեղակայել հակամարտության այլ գոտիներում, Մոսկվային մատնացույց են անելու նրանց ձախողված փորձն Արցախում:

Մանրամասները՝ տեսանյութում։

Նարեկ Կիրակոսյան