16.09.2026 | 21:15
Վթար Չարենցավան-Հրազդան ավտոճանապարհին. նախնական տվյալներով՝ կան չորս զոհ, մեկ տուժած
Ռուսական ընդդիմադիր «Նովայա գազետա» թերթը դադարեցնում է գործունեությունը
Քաղաքականություն
28.03.2022 | 17:15
«Ռոսկոմնադզորը» երկրորդ նախազգուշացումն է արել «Նովայա գազետա»-ի խմբագիրներին Ռուսաստանի Դաշնության օրենքների խախտման անթույլատրելիության մասին։ Այս մասին մարտի 28-ին հայտնել է լրատվամիջոցը՝ հավելելով, որ որոշում են կայացրել կասեցնել խմբագրության գործունեությունը։
«Ռոսկոմնադզորից ևս մեկ զգուշացում ենք ստացել։ Դրանից հետո մենք կասեցնում ենք թերթի հրապարակումը ցանցերում և թղթի վրա մինչև «Ուկրաինայի տարածքում հատուկ գործողության ավարտը»»,- ասվում է լրատվամիջոցի կայքում տեղադրված հաղորդագրության տեքստում։
«Նովայա գազետան» ռուսական հասարակական-քաղաքական թերթ է։ Հայտնի է ընդդիմադիր, ազատական, դեմոկրատական և մարդու իրավունքների ուղղվածությամբ, ինչպես նաև լրագրողական հետաքննություններով։ Խմբագրությունը գտնվում է Մոսկվայում, 2021 թվականի հոկտեմբերի դրությամբ՝ խմբագրությունում աշխատում է 138 մարդ, թերթը լույս է տեսնում շաբաթը երեք անգամ։
Պարբերականը և նրա աշխատակիցները բազմիցս դարձել են մասնագիտական, հասարակական և պետական մրցանակների դափնեկիր։ Հրապարակման առնվազն հինգ լրագրող սպանվել է, ենթադրաբար, մասնագիտական գործունեության պատճառով։ Թերթի գլխավոր խմբագիր Դմիտրի Մուրատովը 2021 թվականին արժանացել է Խաղաղության Նոբելյան մրցանակի՝ «մտքի ազատությունը որպես ժողովրդավարության և խաղաղության անփոխարինելի պայման պահպանելու ջանքերի համար»։ 2022 թվականի մարտի 22-ին Դմիտրի Մուրատովը և թերթի աշխատակիցները որոշեցին 2021 թվականի Խաղաղության Նոբելյան մրցանակը նվիրաբերել Ուկրաինայի փախստականների հիմնադրամին։
Տաթև Ֆռանգյան
