14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Նարեկ Մկրտչյանն ընդունել է Ասիական զարգացման բանկի հայաստանյան ներկայացուցչության տնօրեն Պաոլո Սպանտիգատիին
Տնտեսություն
26.03.2022 | 13:09
Աշխատանքի և սոցիալական հարցերի նախարար Նարեկ Մկրտչյանը հանդիպում է ունեցել Ասիական զարգացման բանկի հայաստանյան ներկայացուցչության տնօրեն Պաոլո Սպանտիգատիի հետ. տեղեկացնում են Աշխատանքի և սոցիալական հարցերի նախարարությունից:
Հանդիպման ընթացքում քննարկվել են աշխատանքի և սոցիալական պաշտպանության ոլորտում համագործակցության հետագա ուղղություններին առնչվող մի շարք հարցեր։ Կարևորվել է ճգնաժամային իրավիճակներում արագ արձագանքման համակարգի մշակման և ներդրման, ՏՀՏ ենթակառուցվածքի գնահատման ու թարմացման, ՄՍԾ աշխատակիցների կարողությունների ու հմտությունների զարգացման ծրագրերի շուրջ համատեղ աշխատանքների իրականացումը։
Անդրադառնալով Ասիական Զարգացման բանկի աջակցությամբ և «Նորք» տեխնոլոգիաների կենտրոնի կողմից իրականացվող արհեստական բանականության կիրառմամբ կանխատեսող մոդելավորման փորձնական ծրագրի մանրամասներին՝ կողմերը քննարկել են նաև սոցիալական պաշտպանության ոլորտի ՏՏ լաբորատորիայի ստեղծման հնարավորությունը։ Նարեկ Մկրտչյանի խոսքով՝ այն կնպաստի սոցիալական ծառայությունների տրամադրման գործընթացների բարելավմանը, թիրախային և հասցեական ծառայությունների շրջանակի ամրագրմանն ու բացասական զարգացումների կանխարգելմանը․
«Ներկայումս նախարարությունն աշխատանքներ է իրականացնում Միասնական սոցիալական ծառայության լիարժեք կայացման և մի շարք ոլորտային ռազմավարությունների մշակման նպատակով։ Ուրախ կլինենք Ասիական Զարգացման բանկի հետ համագործակցությունն ընդլայնել նաև աշխատանքի և զբաղվածության ոլորտում թիրախային ծրագրերի իրականացման, սոցիալական աշխատողների համար կրթական հարթակների ստեղծման և մի շարք այլ ուղղություններով»։
Պաոլո Սպանտիգատին, բարձր գնահատելով նախարարության հետ համագործակցությունը, նշել է, որ խոցելի խմբերին ուղղված ծրագրերի իրականացումն այս պահին Ասիական զարգացման բանկի գործունեության առանցքում է։
«Կազմակերպության գործունեության շրջանակում վերջերս որպես առաջնահերթություն է սահմանվել նաև խոցելի խմբերի պաշտպանությանն ուղղված ծրագրերի իրականացումը, ինչը մեզ համար համեմատաբար նոր ուղղություն է։ Սոցիալական խնդիրների կարգավորմանն ուղղված միջոցառումների համատեքստում, արհեստական բանականության նոր տեխնոլոգիաների կիրառմամբ, փորձում ենք առավել թիրախային աջակցություն տրամադրել ամենախոցելի խմբերին»,- նշել է Պաոլո Սպանտիգատին։
Հանդիպման ընթացքում կողմերը պայմանավորվածություն են ձեռք բերել հստակեցնել նախարարության կողմից սահմանված այն հրատապ առաջնահերթությունները, որոնց ուղղությամբ կիրականացվեն համատեղ աշխատանքներ։
