06.06.2026 | 13:05
Հայտնի է Հայաստանի հավաքականի հայտացուցակը Ղազախստանի դեմ խաղում․ ԼՈՒՍԱՆԿԱՐ
Դատական գործերի համակարգչային մակագրումը 8-ամսյա ընդմիջումից հետո կարող է վերականգնվել
Հասարակություն
23.03.2022 | 12:57
ԲԴԽ-ն հայտարարություն է տարածել դատական գործերի մակագրման համակարգի առնչությամբ։
Հայտարարությունում ասված է․ «ՀՀ գլխավոր դատախազությունը ՀՀ Բարձրագույն դատական խորհրդի աշխատակազմ՝ դատական դեպարտամենտին տեղեկացրել է դատական գործերի համակարգչային մակագրման ծրագրի վերագործարկման թույլատրելիության և քննվող քրեական գործով դրա համար խոչընդոտների բացակայության մասին:
Ներկայումս «Դատական համակարգ» համակարգչային ծրագրի հեղինակ և սպասարկումն ապահովող կազմակերպության և դատական դեպարտամենտի մասնագետների կողմից կատարվում են նախապատրաստական անհրաժեշտ աշխատանքներ համակարգի ամբողջական շահագործումն ապահովելու համար:
Մենք շահագրգիռ ենք մակագրման համակարգչային ծրագրի արագ վերագործարկման հարցում»:
Հիշեցնենք՝ համակարգը չի գործում արդեն 8 ամիս՝ 2021-ի հուլիսի 22-ից, երբ Ազգային անվտանգության ծառայությունն առգրավեց ավտոմատ մակագրման համակարգիչները։ Այս ընթացքում դատական գործերի մակագրումն իրականացվում էր ձեռքով, ինչը փաստաբանների, դատավորների և իրավապաշտպանների կարծիքով խախտում է արդար դատաքննության իրավունքը։
