Հաշվեքննիչ պալատի ընթացիկ եզրակացության վերաբերյալ քննարկումը հետաձգվեց

ԱԺ Ֆինանսավարկային և բյուջետային ու Առողջապահության հարցերի մշտական հանձնաժողովներն այսօր Գևորգ Պապոյանի և Նարեկ Զեյնալյանի նախագահությամբ հրավիրած համատեղ նիստում քննարկեցին «ՀՀ առողջապահության նախարարությունում 2021թ. պետական բյուջեի 9 ամիսների կատարման հաշվեքննության արդյունքների վերաբերյալ» ՀՀ հաշվեքննիչ պալատի ընթացիկ եզրակացությունը:

Հիմնական զեկուցող ՀՀ հաշվեքննիչ պալատի 7-րդ վարչության պետ Խաչիկ Փափազյանը նշեց, որ հաշվետու ժամանակահատվածում առողջապահության նախարարությունն իրականացրել է 15 բյուջետային ծրագիր, որի համար նախատեսվել է շուրջ 109 միլիարդ դրամ, փաստացի վճարումը կազմել է 95 միլիարդ դրամ: Հաշվեքննության է ենթարկվել 6 բյուջետային ծրագրի 8 միջոցառում: Փափազյանի հավաստմամբ` հաշվեքննության ծածկույթը կազմել է շուրջ 56,4 միլիարդ դրամ:

Խաչիկ Փափազյանը ներկայացրեց նաև ՀՊ-ի կողմից արձանագրված անհամապատասխանությունները: Բժշկական ծառայությունների կատարողականների դիմաց արձանագրվել են ինչպես ավելի, այնպես էլ պակաս վճարման դեպքեր: Առողջապահության հարցերի մշտական հանձնաժողովի նախագահ Նարեկ Զեյնալյանն անընդունելի համարեց հատկապես ամբուլատոր-պոլիկլինիկական ծառայությունների գրանցված գերավճարներն այն դեպքում, երբ այդ ծառայություններից օգտվողների քանակը հստակ է: Իսկ առողջապահության նախարարի տեղակալ Արմեն Նազարյանը տեղեկացրեց, որ Պետական առողջապահական գործակալության ներկայացրած պարզաբանումները ՀՊ-ի արձանագրությունների վերաբերյալ տեխնիկական պատճառներով տեղ չեն հասել: Գործակալության պետի տեղակալ Գարուշ Այվազյանը խոսեց ՀՊ-ի եզրակացությունում արձանագրված անհապատասխանությունների մասին՝ հիմնականում հերքելով դրանք: Քննարկումների արդյունքում որոշվեց նիստը հետաձգել։ Պապոյանն ասաց, որ ժամանակ է տրվում երկու գերատեսչություններին` հարթելու երկուստեք արձանագրած անհամապատասխանությունները: Այսպիսով, հարցի քննարկումը հետաձգվեց։

Մերի Մարտիրոսյան