«Անատամ բանա՞կ ենք ուզում ունենալ»․ Մանուկյանը՝ ՊՆ փոխնախարարին․ ՏԵՍԱՆՅՈՒԹ

ՀՀ զինված ուժերի նպատակը պատերազմ հրահրելը, ագրեսիա դրսևորելը չէ, սակայն պետությունն ամեն ինչ անում է,  որ Զինված ուժերը լինեն մարտունակ, հնարավոր հակահարված տալու ընդունակ:  Այս մասին հայտնեց ՀՀ պաշտպանության նախարարի տեղակալ Արման Սարգսյանն ԱԺ պաշտպանության և անվտանգության հարցերի մշտական հանձնաժողովի նիստում՝ անդրադառնալով «Հայաստան» խմբակցության պատգամավոր Գեղամ Մանուկյանի հարցին:

Մանուկյանը  հետաքրքրվեց Զինված ուժերի բարեփոխումների հայեցակարգի մշակումից: «Կառավարության հաշվետվությունում գրված է, որ այս հայեցակարգը ԶՈՒ-ն զարգացնելու և վերափոխելու է ոչ թե ագրեսիայի, այլ ագրեսիայից պաշտպանվելու նպատակով: Մեր ԶՈՒ-ն երբևէ ագրեսիայի նպատակ ունեցող ԶՈՒ է եղե՞լ, որ հիմա էլ հայեցակարգով ուզում են ոչ ագրեսոր զինված ուժեր ձևավորել, թե՞ ուղղակի անատամ զինված ուժեր»,-հարցրեց պատգամավորը:

Փոխնախարարը, անդրադառնալով պատգամավորի վերջին դիտարկմանը՝ պատասխանեց, որ բնականաբար, նպատակն անատամ բանակ ունենալը չէ, այլ ուղղակի ֆիքսելն է, որ ՀՀ ԶՈՒ-ն ագրեսիայի նպատակ չունի:

«Նախորդիվ, եթե նույնիսկ ամրագրված չի եղել, բնականաբար այն ժամանակ էլ ՀՀ ԶՈՒ նպատակը չի եղել ագրեսիվ գործողություններ կամ այլ բնույթի այդպիսի մարտավարություն ունենալը: Սակայն մենք պետք է ամրագրենք, որ ՀՀ զինված ուժերի նպատակը պատերազմ հրահրելը չէ, ագրեսիա դրսևորելը չէ իր հարևանների նկատմամբ: Եվ սա ամրագրում է ստանալու: Իսկ անատամ լինելու մասին խոսք լինել չի կարող, բնականաբար, ամեն ինչ անում է պետությունը, որ մեր ԶՈՒ-ն լինի մարտունակ, հնարավոր հակահարված տալու ընդունակ՝ ձեռքի տակ ունեցած բոլոր միջոցներով»,-ասաց Սարգսյանը: