Քաղաքականություն
14.03.2022 | 18:35Պաշտոնական Երևանը պատասխանել է Բաքվի հինգ առաջարկներին, սակայն հանրությանը դեռևս հայտնի չէ, թե ինչ հինգ կետերի մասին է խոսքը:
Բացի դրանց՝ ՀՀ-ն դիմել է Մինսկի խմբի համանախագահությանը խաղաղության համաձայնագիր կնքելու նպատակով:
Արցախում ադրբեջանական կողմի սադրանքների հետևանքով ստեղծված իրաիճակում արդյո՞ք ՀՀ իշխանությունների այս քայլերն արդարացված են: Factor.am-ի հետ զրույցում անդրադառնալով այս հարցին՝ ԱԺ «Պատիվ ունեմ» խմբակցության պատգամավոր, ԱԺ մարդու իրավունքների պաշտպանության և հանրային հարցերի հանձնաժողովի նախագահ Թագուհի Թովմասյանը նշեց, որ խաղաղությանն ուղղված ցանկացած քայլ, իհարկե, ողջունելի է, և խաղաղություն ուզում են բոլոր ժողովուրդները: «Բայց ուզում եմ ուշադրություն հրավիրել մի կարևոր հանգամանքի վրա, երբ որ խոսվում է խաղաղության պայմանագրի մասին, կարևոր է, թե ինչ պայմաններ են թելադրվելու»,-նշեց պատգամավորը:
«Կան հարցեր, որոնք ես ուղղել եմ ՀՀ կառավարության ղեկավարին: Ի՞նչ ապագա, ի՞նչ կարգավիճակ է ունենալու Արցախը, տարածքային ամբողջականությունն արդյո՞ք ենթադրում է անկլավների ճանաչում և եթե այո, ապա ո՞ւմ տարածքային ամբողջականության շրջանակներում են ճանաչվում: Պետք է հրապարակային պարզաբանվի, թե ինչ նկատի ունեն կումունիկացիաների բացում ասելով, ի՞նչ է դա ենթադրում: Ի՞նչ է լինելու ռուս խաղաղապահների ճակատագիրը, ո՞ւմ վերահսկողության տակ են մնալու Արցախի բնակիչները: Միայն խաղաղության թեզով կերակրելը չի նվազեցնում ռիսկերը:
Եվ, թերևս, ամենակարևորը, անընդհատ խոսվում է սահմանների ճշգրտման՝ դեմարկացիայի, դելիմիտացիայի մասին, հարց է առաջանում ՝ ո՞ր քարտեզով, դա է որոշելու մեր երկրի ապագա չափը:
ՀՀ կառավարությունը պետք է պարզաբանի՝ ո՞րն է Ադրբեջանի հետ խաղաղության գինը»,- ընդգծեց Թովմասյանը:
Մանրամասները՝ տեսանյութում:
