Արցախի խնդիրը կարևոր է միջազգային կառույցների համար, բայց աշխարհում հիմա տասնյակ այլ կոնֆլիկտներ կան․ Արման Եղոյան․ ՏԵՍԱՆՅՈՒԹ

Օրերս հայտնի դարձավ, որ ԵԽԽՎ-ն ընդունեց «Լեռնային Ղարաբաղի մշակութային ժառանգության ոչնչացման մասին» բանաձևը: Արցախի խորհրդարանը դրական է գնահատել այդ քայլը: Factor.am-ի հետ զրույցում անդրադառնալով այս դիտարկմանը՝ «Քաղաքացիական պայմանագիր» խմբակցության պատգամավոր Արման Եղոյանը նշեց, որ նման բանաձևերը նախևառաջ ձևավորում են քաղաքական խոսույթ, դառնում են քաղաքական խոսքի բովանդակության ու տոնի չափանիշ:

«Եվրոպացի դիվանագետներին, խորհրդարանականներին, գործադիրի անդամներին նման բանաձևերը տեղեկացնում են, թե ինչ է կատարվում և ինչ քաղաքական դիրքորոշում ունի ԵՄ օրենսդիր մարմինը: Այս բանաձևը որոշակի դիտանկյունից նաև բացատրում է, թե որն է խնդրի պատճառը, հետևանքները, այսինքն՝ խնդրի էությունն է բացահայտում: Այս առումով բանաձևի ընդունումը շատ կարևոր է մեզ համար»,- նշեց Եղոյանը:

Այսօր հայտնի դարձավ, որ ԵՄ-ն հանդես է եկել հայտարարությամբ, մտահոգված է Արցախում հրադադարի խախտումներով և Արցախ մտնող գազատարի խնդրով: Ադրբեջանական կողմը պայթեցումից հետո մի քանի օր է չի թույլատրում նորոգել գազատարի վնասված հատվածը:

Արդյո՞ք ադրբեջանական կողմը ԵՄ հայտարարության հետ հաշվի կնստի: Այս հարցին ի պատասխան՝ Եղոյանը նշեց, որ դա ճնշման մի լծակ է, որը կարող է ազդցություն ունենալ Ադրբեջանի վրա, կարող է և չունենալ՝ կախված աշխարհաքաղաքական համատեքստից և խոշոր խաղացողների հետ Ադրբեջանի հարաբերություններից: «ԵՄ-ն խոշոր խաղացող է և լուրջ տնտեսական գործընկեր է, բայց կան նաև այլ գործընկերներ, որոնց դիրքոորոշումը շատ ավելի էական է՝ ոչ տնտեսական գործոնների բերումով»,- ասաց պատգամավորը:

Անդրադառնալով հարցին, թե միջազգային հանրության մոտ կա՞ տրամադրվածություն, որպեսզի Արցախի խնդրով զբաղվի, Եղոյանն ընդգծեց. «Արցախի խնդիրը կարևոր է միջազգային կառույցների համար, բայց աշխարհում հիմա տասնյակ այլ կոնֆլիկտներ կան»:

Մանրամասները՝ տեսանյութում: