14.12.2024 | 12:52
NYMEX. Թանկարժեք մետաղների գները նվազել են
Մեր տան աղը դարակում է. Ավանեսյանը պնդում է՝ նոր նախագծով պայքարում են մարդկանց առողջության համար․ ՏԵՍԱՆՅՈՒԹ
14.03.2022 | 14:25
ՀՀ առողջապահության նախարար Անահիտ Ավանեսյանն այսօր Կառավարության նիստից հետո լրագրողների հետ ճեպազրույցում անդրադարձավ աղամանները սննդի կետերի սեղաններից վերացնելու մասին նախագծին:
«Աղի օգտագործման սահմանափակմանը նպաստող օրինագիծն ուղղված է դրա չափաբաժնի պակասեցմանը, այլ ոչ թե դրա՝ սննդակարգից հանելուն»,- հավաստիացրեց նախարարը:
Նրա խոսքով՝ աղի օգտագործման սահմանափակմանը ուղղված միջոցառումները հիմնավորված են հետազոտությունների տվյալներով, համաձայն որոնց՝ օրական 5 գրամից ավելի աղի օգտագործումը հանգեցնում է մի շարք հիվանդությունների առաջացմանը կամ սրմանը:
Նախարարը հայտնեց, որ հաջորդ շաբաթվա ընթացքում առողջապահության նախարարությունն աղի օգտագործման թեմայով քննարկումներ կանցկացնի ռեստորանների ներկայացուցիչների, սպառողների շահերը պաշտպանողների և սննդաբանների հետ։
Ավանեսյանի կարծիքով՝ նախագծի շուրջ ոչ թե աղմուկ բարձրացավ, այլ այն հանրային քննարկման լավ առիթ տվեց:
«Ուրախ եմ, որ քաղաքացիները բուռն քննարկում են այս թեման։ Խնդիրն այն է, որ մենք աղի օրական չափաբաժնի կրկնակին ենք օգտագործում, որը հանգեցնում է խրոնիկական հիվանդությունների սրացման։ Ուզում ենք՝ քաղաքացիների սովորությունների մեջ որոշակի փոփոխություն մտցնենք։ Խոսքն այն մասին է, որ առանց ճաշի համն առնելու աղ են ավելացնում»,- ասաց առողջապահական գերատեսչության ղեկավարը՝ վստահեցնելով՝ մեր տան աղը դարակում է:
Հիշեցնենք, որ նոր արգելքը խախտելու դեպքում նախարարությունն առաջարկում է տնտեսվարողին տուգանել 30.000 դրամի չափով:
Մանրամասները՝ տեսանյութում:
