01.11.2024 | 23:19
Հրդեհ Գյումրու տներից մեկում
Ամեն ինչի ճգնաժամի ռիսկ կա. Վահագն Ալեքսանյանը` հացահատիկի հավանական խնդրի մասին․ ՏԵՍԱՆՅՈՒԹ
Տնտեսություն
07.03.2022 | 11:34
Հայաստանն այս պահին հացահատիկի խնդիր չունի: Խորհրդարանական ճեպազրույցի ընթացքում այս մասին վստահեցրեց «Քաղաքացիական պայմանագիր» խմբակցության պատգամավոր Վահագն Ալեքսանյանը՝ ընդգծելով. «Առնվազն այս պահին նման խնդրի մասին ինձ հայտնի չէ»:
ԱԺ Արտաքին հարաբերությունների մշտական հանձնաժողովի նախագահ Էդուարդ Աղաջանյանը հավելեց. «Հացահատիկի պաշարի մասին ինֆորմացիան գաղտնի տեղեկություն է, չի հրապարակվում»:
Ալեքսանյան էլ նշեց, թե ակնհայտ է՝ ռիսկեր կան, ամբողջ աշխարհում ճգնաժամի ռիսկ կա։ Թե ինչ է արվում, որ Հայաստանը հացահատիկի խնդիր չունենա, պատգամավորը հավաստիացրեց, որ էկոնոմիկայի նախարարությունն անում է հնարավոր ամենը՝ փորձելու կառավարել ռիսկերը։
«Բայց չենք կարող բացառել, որ աշխարհում ցանկացած մի բանի ճգնաժամ կարող է առաջանալ», – նշեց Ալեքսանյանը։
Էդուարդ Աղաջանյանն էլ ընդգծեց՝ չի հասկանում, թե ինչու են սևեռվել հացահատիկի խնդրի վրա. «Կան բազմաթիվ այլ խնդիրներ, միգուցե, ավելի կարևոր, քան հացահատիկի խնդիրը»:
Մանրամասները՝ տեսանյութում:
