Պարոն Դումանյան,Դուք հաշվապա՞հ եք, թե՞ կրթության նախարար․ Գրիգորյանը՝ ՀՊՏՀ Եղեգնաձորի մասնաճյուղի մասին․ ՏԵՍԱՆՅՈՒԹ

«Հայաստան» խմբակցության պատգամավոր Աննա Գրիգորյանն այսօր Ազգային ժողովի նիստում անդրադարձավ Վայոց ձորի միակ բուհի՝ Հայաստանի պետական տնտեսագիտական համալսարանի Եղեգնաձորի մասնաճյուղի փակման հարցին:

Նշենք, որ Հայաստանի պետական տնտեսագիտական համալսարանի Եղեգնաձորի մասնաճյուղում 2022-2023 թթ․ համար ընդունելություն չի լինի։

«Երբ մասնաճյուղը հիմնադրվում էր, ուներ երկու հիմնական նպատակ՝ տարածքային համաչափ զարգացում ու սոցիալական խնդիրների լուծում կրթության միջոցով:

Հիմա ես ուզում եմ հասկանալ՝ այս երկու նպատակից ո՞րն է իրականացվել, որ որոշվել է մասնաճյուղը փակել: Այս խնդիրներից որևէ մեկը դուք չեք լուծել, հետևաբար, անընդունելի է այս որոշման իրականացումը:

Մի քանի օր առաջ կրթության նախարարն այստեղ  կանգնած խոսում էր  ինչ որ ֆինանսական խնդիրներից։ Պարո՛ն նախարար, Դուք հաշվապա՞հ եք, թե՞ կրթության նախարար։  Ձեր ֆունկցիան պետք է լինի որակյալ կրթություն ապահովելը  ողջ Հայաստանի տարածքով։ Փոխանակ գաք ու ասեք, թե ստեղծված խնդիրները ոնց կարող ենք լուծել, որակյալ կրթություն ոնց կարող ենք ապահովել, գալիս ու ասում եք՝ ֆինանսական խնդիրներ կան, նպատակահարմար չենք համարում, եթե այդպես է՝ եկեք սահմանամերձ բոլոր բնակավայրերում դպրոցները փակենք, կարող է պարզվի՝ ֆինանսական առումով ձեռնտու չէ», – նշեց պատգամավորը:

Դիմելով ՔՊ-ական սյունեցի պատգամավորներին՝ ընդդիմադիր պատգամավորը հետաքրքրվեց՝ արդյոք այս հարցով նրանք դիրքորոշում չունեն:

«Դուք որևէ դիրքորոշում չունե՞ք, ձեզ չի՞ անհանգստացնում, որ այնտեղ մասնաճյուղ է փակվում. ավարտողների 90 տոկոսն աշխատում է մարզում ու էապես այնտեղ փոխել են աշխատաշուկան ու սա, կարծում եմ, լիարժեք խնդիր է, որ պետք է լուծում ստանա: Նախկին մարզպետները, կարծում եմ, պետք է հայտնեն իրենց դիրքորոշումը», – նշեց Գրիգորյանը:

Մանրամասները՝ տեսանյութում: