20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Մեր ժամանակ բանակցվածից կրկնակի ավելը տվել եք․ ընդդիմադիր պատգամավորը՝ իշխանություններին. ՏԵՍԱՆՅՈՒԹ
Քաղաքականություն
03.03.2022 | 15:51
«Երբ որ դուք ասում եք՝ նախորդ նախագահների ժամանակ խոսվել է յոթ շրջանների փոխանցման կամ հանձնման մասին, շատ կարևոր առանձնահատկություն կա, վստահ եմ, որ գոնե դուք դա գիտեք, բայց, որպես կանոն, այդ մասին չեք խոսում»,-ԱԺ լիագումար նիստում նշեց «Պատիվ ունեմ» խմբակցության պատգամավոր Տիգրան Աբրահամյանը՝ արձագանքելով ԱԺ փոխնախագահ Ռուբեն Ռուբինյանի հարցադրմանը, որ եթե Ռոբերտ Քոչարյանն ու Սերժ Սարգսյանը բանակցել են Արցախի յոթ շրջաններն Ադրբեջանին վերադարձնելու մասին, ստացվում է, որ նրանք էլ պոտենացիալ հողատունե՞ր են։
«Այդ առանձնահատկությունն այն է, թե ինչ ունեինք բանակցային գործընթացի փաթեթում՝ 90-ականներից սկսած, 2000-ականներին․ ի՞նչ ենք ունեցել 2018թ, երբ իշխանության ղեկը ստանձնել եք դուք:
Երբ դուք բանակցային գործընթացը մեկնաբանում եք տարածքները հանձնելու՝ յոթ շրջանների տրամաբանության ներքո, իրականում մինչև 2018թ. բանակցություններն ընթացել են ոչ թե տարածքները հանձնելու, այլ Արցախի ինքնորոշման իրավունքի իրացման, դրա միջազգային ճանաչման, Արցախի ապագայի որոշակիացման պայմաններում։
Ձեզ հիշեցնեմ, որ 2020թ. պատերազմից հետո մենք ոչ միայն կորցրել ենք Կազանի փաստաթղթում ամրագրված հինգ շրջանները, այլև Շուշին` իր գյուղերով, Հադրութն՝ ամբողջությամբ, նաև Մարտակերտից ութ գյուղ, Ասկերանի ենթաշրջանի ութ գյուղ, մի քանի գյուղ էլ Մարտունու շրջանից։
Ձեր իշխանության օրոք մեր ժամանակ բանակցված հնարավոր փոխանցվելիք տարածքներից կրկնակի ավելին է հայտնվել Ադրբեջանի օկուպացիայի տակ»,- նշեց Տիգրան Աբրահամյանը:
Նա նաև ընդգծեց, որ Խծաբերդը, Հին թաղերը, Սանասարն ու Կովսականը նոյեմբերի 9-ի փաստաթղթով հանձնման ենթակա չէին:
«Ավելին՝ անցած տարի ադրբեջանական զորքերը, առանց դիմադրության, շվշվացնելով մտան Սյունիք, Վայոց ձոր և Գեղարքունիք, 41 կմ տարածք հայտնվեց ադրբեջանական վերահսկողության տակ… Սուր ճոճելով իրականությունը չի փոխվելու… Պատմությունը մնում է, արձանագրումները մնում են»։
Մանրամասները՝ տեսանյութում:
