Ռոբերտ Քոչարյանի ակտիվ անգործությունը պետությանը վնաս տվեց․ Վահագն Խաչատուրյան. ՏԵՍԱՆՅՈՒԹ

ԱԺ այսօրվա նիստում «Քաղաքացիական պայմանագիր» խմբակցության պատգամավոր Վլադիմիր Վարդանյանը հիշեցրեց նախկինում նախագահի կողմից դրսևորված անգործության դրվագ. «Պատգամավորները դիմել էին Ռոբերտ Քոչարյանին, որ վերջինս հրավիրեր արտահերթ նիստ, և նախագահը որևիցե եղանակով չէր արձագանքել. դա դիտարկվեց որպես անգործություն: ՍԴ-ում հարցը չքննարկվեց, որովհետև ՍԴ-ն չուներ լիազորություն քննարկելու նախագահի անգործությունը»:

Պատգամավորի խոսքով՝ ՍԴ նոր կարգավորումներով այս հարցը կարգավորված է: «Սահմանադրության համաձայն՝ նախագահն ունի լիազորություն՝ օրենքները և ակտերը ստորագրել կամ դիմել ՍԴ: Եվ, որպես վթարային ելք, նախատեսված է անգործության արդյունքում այդ իրավունքը վերապահել այլ սուբյեկտի՝ մասնավորապես Ազգային ժողովի նախագահին:

Ցավոք վերջին շրջանում բախվել ենք ակտիվ անգործության հետ, որն իրավական որոշակիությունից զուրկ վիճակ էր ստեղծել, մասնավորապես այն ժամանակ, երբ ՀՀ նախագահը հայտարարել էր, որ դրսևորելու է անգործություն: Եվ այդ պարագայում ԱԺ-ն չէր հասկանում՝ ինչ անել, և այդ անգործությունը դիտարկել որպես վերջնական կամքի դրսևորո՞ւմ, թե՞ ոչ»,- նշեց Վարդանյանը և ՀՀ նախագահի թեկնածու Վահագն Խաչատուրյանից հետաքրքվեց՝ ինչպես է վերաբերվում այդ պրակտիկային, արդյոք նախատեսում է ակտիվ անգործություն դրսևորել:

«Ես նույնիսկ չեմ էլ պատկերացնում՝ ինչպիսի իրավիճակներում պիտի լինենք, որ այդպիսի հայտարարություն անենք, որովհետև ՀՀ նախագահը նախագահ է և նրա լիազորությունները հստակ են: Այդ տիպի անգործությունն ինձ համար անընդունելի է: Երեք տարբերակ կա՝ կա՛մ ստորագրում եք, կա՛մ ուղարկում եք ՍԴ՝ մեկնաբանության, կա՛մ ակտիվ անգործություն ենք դրսևորում:

Չգիտեմ Ռոբերտ Քոչարյանի դեպքում ինչպես էր, ակտիվ էր, թե պասիվ էր, բայց այդ անգործությունը պետությանն ահռելի վնաս տվեց… Ես գտնում եմ, որ դա ուղղակի քաղաքական քայլ էր, և քանի որ ՀՀ նախագահը, Սահմանադրության համաձայն, քաղաքականությամբ զբաղվելու իրավունք և լիազորություններ չունի, կարելի է դա նույնիսկ համարել իրավազանցություն»,- նշեց Խաչատուրյանը:

Մանրամասները՝ տեսանյութում: