Ռուբլու ազատ անկումը․ աննախադեպ արժեզրկում մի քանի օրում․ ՏԵՍԱՆՅՈՒԹ

Ռուս-ուկրաինական պատերազմի հետևանքները ֆինանսական շուկայում գնալով ավելի ու ավելի նկատելի են դառնում։ Այսօր ռուսական ռուբլի-դրամ փոխարժեքի աննախադեպ ցածր ցուցանիշ է գրանցվել։ Ժամը 16։00-ի դրությամբ, ըստ rate.am կայքի տվյալների, հայաստանյան բանկերում ռուբլին գնվում էր միջինը 3 դրամ փոխարժեքով, վաճառվում՝ 6,16 դրամով։

Տարադրամի փոխանակման կետերում ռուսական արժույթի համար ավելի բարձր փոխարժեք էր առաջարկվում։ Ժամը 16։00-ի դրությամբ՝ 1 ռուբլին գնվում էր 4,7 դրամով, վաճառվում՝ առավելագույնը 5,9 դրամով։

Փետրվարի սկզբին ռուբլու փոխարժեքը 6 դրամից բարձր էր, բայց արդեն փետրվարի 21-ից սկսեց անկում ապրել՝ հասնելով պատմական նվազագույնին։

Դոլարի ու եվրոյի փոխարժեքներն էլ ռուբլու նկատմամբ հասել են պատմական առավելագույնին։ Ռուբլու այս անկումը պայմանավորված է փետրվարի 24-ին Ուկրաինայում սկսված պատերազմով և դրան հաջորդած արևմտյան պատժամիջոցներով։

Ստեղծված իրավիճակում, ռուբլու անկումը կանխելու նպատակով, Ռուսաստանի Կենտրոնական բանկը հիմնական տոկոսադրույքը բարձրացրել է՝ 9,5 տոկոսից հասցնելով պատմական առավելագույնի՝ 20 տոկոսի: Ու չնայած այս ջանքերին՝ Ռուսաստանում բանկոմատների մետ հսկայական հերթեր են գոյանում։

Երեկ Ռուսաստանի Կենտրոնական բանկը հայտարարություն էր տարածել, որում, մասնավորապես, ընդգծել է, որ ունի անհրաժեշտ պաշարներ ու գործիքներ՝ ֆինանսական կայունությունը պահպանելու և ֆինանսական հատվածի գործառնական անընդհատությունն ապահովելու համար: Չնայած դրան՝ ռուսական բանկային համակարգը շուտով կարող է անջատվել SWIFT միջազգային վճարային համակարգից, ինչը, մասնագետների կարծիքով, լրջագույն հետևանքներ կունենա։

Մանրամասները՝ տեսանյութում։

Սաթենիկ Հայրապետյան