19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Էրդողանը չի բացառել Հայաստանի հետ սահմանի բացումը
Քաղաքականություն
23.02.2022 | 17:30
Թուրքիայի նախագահ Ռեջեփ Թայիփ Էրդողանն այսօր լրագրողների հետ զրույցում անդրադարձել է նաև հայ-թուրքական հարաբերությունների կարգավորմանը, գրում է «Անադոլու» գործակալությունը։
Էրդողանը նշել է, որ Հայաստանի կողմից ձեռնարկվող դրական քայլերին նույն կերպ կպատասխանեն։
«Այս տարածաշրջանը խաղաղության, կայունության և բարգավաճման կարիք ունի։ Այս ըմբռնմամբ մենք անկեղծ ջանքեր գործադրեցինք մեր երկրի և Հայաստանի միջև հարաբերությունների կարգավորման գործընթաց սկսելու համար։ Իմ եղբայրը՝ Ադրբեջանի նախագահ Իլհամը նույնպես դա օգտակար է համարում։ Մենք գոհ ենք մեզ հետ հարաբերությունների կարգավորման Հայաստանի կամքից, փոխադարձաբար նշանակեցինք հատուկ ներկայացուցիչներ՝ այս գործընթացն իրականացնելու համար, և նրանք իրենց առաջին հանդիպումն անցկացրին Մոսկվայում հունվարի 14-ին: Փետրվարի 24-ին նրանք կհանդիպեն Վիեննայում»,-ասել է Էրդողանը։
Ըստ Թուրքիայի նախագահի՝ Հայաստանը «որոշակի ակնկալիքներ ունի այս գործընթացից», ինչպիսին է սահմանների բացումը և դիվանագիտական հարաբերությունների հաստատումը։
«Եթե Հայաստանը հաստատակամ է շարունակելու գործընթացը, որը սկսվել է հատուկ ներկայացուցիչների մասնակցությամբ, ապա մեզ համար դռները փակ պահելու հարց չի լինի»,- ասել է Էրդողանը՝ նկատի ունենալով ՀՀ-ի հետ սահմանի բացումը։
Թուրքիայի նախագահը հիշեցրել է Ստամբուլի և Երևանի միջև չվերթների վերսկսման մասին։
Բացի այդ, Էրդողանն ասել է, որ Ադրբեջան-Հայաստան և Թուրքիա-Հայաստան հարաբերությունների կարգավորման գործընթացները կարող են առաջընթաց ունենալ՝ միմյանց աջակցելով։ Նա ևս մեկ անգամ ընդգծել է, որ Թուրքիան շարունակելու է բոլոր գործընթացներն իրականացնել Ադրբեջանի հետ սերտ համակարգմամբ։
Հիշեցնենք՝ հայ-թուրքական երկխոսության շրջանակում Հայաստանի ու Թուրքիայի հատուկ ներկայացուցիչների հաջորդ հանդիպումը տեղի է ունենալու վաղը Վիեննայում։
Էմմա Չոբանյան
