17.12.2025 | 22:29
Երևանում և 9 մարզում էկեկտրաէներգիայի անջատումներ կլինեն
Բերման ենթարկվելու ժամանակ լրագրողը ներկայացրե՞լ է փաստաթուղթ․ ՀԺՄ նախագահը հաստատում է, ոստիկանությունը հերքում
Հասարակություն
23.02.2022 | 14:45
Երեկ երեկոյան Երևանի Հանրապետության հրապարակում «Արմենիա Մարիոթ» հյուրանոցի դիմաց, ՀՅԴ Հայաստանի երիտասարդական միության մի խումբ անդամներ բողոքի ակցիա են իրականացրել՝ իրենց դժգոհությունն արտահայտելով Ադրբեջանի խորհրդարանի պատգամավորների այցի կապակցությամբ։
Ակցիայի ժամանակ մասնակիցները փորձել են մուտք գործել հյուրանոց, ոստիկանական ուժերի հետ ընդհարում է եղել, 25 անձ բերման է ենթարկվել ոստիկանական բաժին, այդ թվում՝ «Երկիր Մեդիա» հեռուստաընկերության լրագրող Անի Նահապետյանը։ Լրագրողը հանցագործության մասին հաղորդում է տվել առ այն, որ մասնագիտական գործունեություն իրականացնելու ժամանակ իրենց ապօրինի կերպով բերման են ենթարկել՝ չնայած այն հանգամանքին, որ կրելիս է եղել լրագրողական տարբերանշանը։
Ոստիկանությունն այսօր պարզաբանում է տարածել, հայտարարելով, թե բերման ենթարկելու ժամանակ որևէ մեկը չի ներկայացել որպես լրատվամիջոցի ներկայացուցիչ և չի ներկայացրել համապատասխան փաստաթուղթ․
«Վարչական շենքի մուտքի դիմաց և ներսում բերված անձինք սկսել են բղավել և խոչընդոտել ոստիկանության ծառայողների գործողություններին: Ոստիկանության ծառայողները հանդարտվելու և անօրինական գործողությունները դադարեցնելու կոչեր են արել, սակայն նշված քաղաքացիները սկսել են հնչեցնել սեռական բնույթի հայհոյանքներ ոստիկանության ծառայողների հասցեին, անընդհատ հրահրել են վիճաբանություն՝ դրսևորելով բացահայտ անհարգալից վերաբերմունք ոստիկանության ծառայողների նկատմամբ և խոչընդոտելով Կենտրոնական բաժնի աշխատանքի բնականոն ընթացքը»,- նշվում է Ոստիկանության տարածած հաղորդագրության մեջ։
Ժուռնալիստների միության նախագահ Սաթիկ Սեյրանյանը հակառակն է պնդում․ ըստ նրա՝ լրագրողի փոստաթուղթը երևում է բերման ենթարկվելու պահին, բացի այդ կադրերում չի նկատվում, որ լրագրողը չէր ենթարկվում ոստիկանների պահանջին։
Փաստի առթիվ հարուցվել է քրեական գործ՝ ՀՀ քրեական օրենսգրքի 258-րդ հոդվածի 1-ին մասի՝ խուլիգանության հատկանիշներով: Կատարվում է նախաքննություն:
Ռոզա Վարդանյան
