«Ժեխ», «զոմբի», «պիցցայակեր» բառերով նպաստում էին ատելության խոսքի տարածմանը. Արման Թաթոյան․ ՏԵՍԱՆՅՈՒԹ

Անհրաժեշտ է վերականգնել երկրում հանրային համերաշխությունը: Այսօր հրավիրված ասուլիսում այս մասին նշեց ՀՀ Մարդու իրավունքների պաշտպան Արման Թաթոյանը։

ՄԻՊ-ի դիտարկմամբ՝ ներդրված դատապարտելի դիսկուրսների պատճառով  այսօր խաթարված է հանրային համերաշխությունը և, ցավոք սրտի, դրա վերականգնելու հեռանկարները շատ մշուշոտ են: Թաթոյանի խոսքով՝ դատապարտելի է, որ հասարակական,  քաղաքական հարթակ բերվեց «նոր ու նախկին», «սև ու սպիտակ» պիտակավորման դիսկուրսը, ըստ էության, հասարակությանը բաժանելով խմբերի։

«Սրան ավելացվեց նորից դատապարտելի «ժեխ», «զոմբի», «պիցայակեր», «ծախված» և այլ պիտակավորումները։ Ներողություն եմ խնդրում, որ այս բառերը ստիպված եմ արտաբարել, բայց ուզում եմ ցույց տալ հասարակությանը  պառակտող դիսկուրսները նաև սոցիալական ցանցերի  կեղծ էջերի, կազմակերպված արշավների միջոցով»,- ասաց Ա. Թաթոյանը։

Նրա խոսքով՝ անթույլատրելի և վտանգավոր հայհոյանքի դիսկուրս կա մեր հանրային տիրույթում։

«Պետությունն այստեղ  լրջագույն  անելիք ունի, մինչդեռ պետությունն ի՞նչ է անում։ Իմ կարծիքով, ինքն էլ է  նպաստում այս ամենի աճին և հետո անթույլատրելի մեթոդներով  սկսում է պայքարել իր իսկ նպաստած  խնդիրների դեմ»,- ասաց Թաթոյանը՝

ՄԻՊ-ի դիտարկմամբ՝ քաղաքական պաշտոնյաներն ատելություն, ներքին թշնամանք են հրահրում իրենց տարբեր անթույլատրելի հայտարարություններով: Նրա խոսքով՝ ծանր վիրավորանքի վերաբերյալ հոդվածը դարձել է քաղաքական գործիչներին ու պաշտոնյաներին պաշտպանող հոդվածը և ընդհանրապես չի վերացել հայհոյանքն ու վիրավորանքը մեր հանրային դիսկուրսից։

Մանրամասները՝ տեսանյութում: