19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Ալիևը հայտնել է, որ ՌԴ-ի և Ադրբեջանի դաշնակցային համագործակցության մասին հռչակագրում ավելի քան 40 կետ կա
Քաղաքականություն
22.02.2022 | 19:40
Ադրբեջանի նախագահ Իլհամ Ալիևը ՌԴ նախագահ Վալդիմիր Պուտինի հետ հանդիպմանը գոհունակություն է հայտնել, որ ՌԴ գործընկերոջ հետ հանդիպումները պարբերական բնույթ են կրում, փոխանցում են ադրբեջանական լրատվամիջոցները։
«Մենք մշտական կապի մեջ ենք, զանգահարում ենք միմյանց և, իհարկե, անձնական հանդիպումները միշտ առանձնահատուկ նշանակություն ունեն, հատկապես, ինչպես Դուք նշեցիք, մեր երկրների միջև, կարծում եմ, կարևորագույն փաստաթղթի ստորագրման նախաշեմին։ Խորհրդանշական է, որ դա տեղի է ունենում մեր երկրների միջև դիվանագիտական հարաբերությունների հաստատման 30-ամյակին ընդառաջ։ Կարծում եմ՝ այդ փաստաթուղթը միանշանակ դրական ազդեցություն կունենա մեր երկրների, մեր համագործակցության, ինչպես նաև տարածաշրջանային անվտանգության համար»,- ասել է Ալիևը։
Նա նաև նշել է, որ գնահատում են երկու երկրների միջև ձևավորված բարեկամական, բարիդրացիական հարաբերությունները և ամրապնդում դրանք։
«Դաշնակցային համագործակցության մասին հռչակագրի ստորագրումը շատ լավ ցույց է տալիս, թե որքան ակտիվ ենք մենք աշխատել վերջին տարիներին և զարգացրել փոխադարձ համագործակցության ներուժը: Դրանք ոչ միայն խոսքեր էին, մտադրություններ, այլև կոնկրետ գործեր։ Հռչակագիրը բավականին ծավալուն է՝ պարունակում է ավելի քան 40 կետ։ Այն ընդգրկում է մեր փոխգործակցության ամենակարևոր ոլորտները և, ինչպես արդեն ասացի, կարևորագույն նշանակություն կունենա մեր երկկողմ հարաբերությունների ապագայի համար»,- ասել է Ադրբեջանի նախագահը։
Հավելենք, որ այսօր երկու երկրների նախագահները դաշնակցային համագործակցության մասին հռչակագիր են ստորագրելու։
Էմմա Չոբանյան
