Քաղաքականություն
19.02.2022 | 20:00
Ֆրանսիայի ԱԳՆ-ը կոչ է արել Ուկրաինայում գտնվող իր քաղաքացիներին լքել երկիրը։ Այս մասին ասված է շաբաթ Ֆրանսիայի արտաքին քաղաքական գերատեսչության կայքում հրապարակված հաղորդագրության մեջ։
«Բոլոր ֆրանսիացի քաղաքացիներին, որոնց Ուկրաինայում մնալը ծանրակշիռ հիմքեր չունի, խորհուրդ է տրվում լքել երկիրը։ Նաև խորհուրդ է տրվում հետաձգել Ուկրաինա կատարած բոլոր ուղևորությունները։ Ֆրանսիայի քաղաքացիներին, որոնք գտնվում են Խարկովի, Լուգանսկի և Դոնեցկի մարզերում, որպես նախազգուշական միջոց խորհուրդ է տրվում անհապաղ հեռանալ այդ շրջաններից»,- նշվում է կայքում։
«Լարվածության պայմաններում, որը պայմանավորված է Ուկրաինայի սահմանների մոտ ռուսական զորքերի կենտրոնացմամբ և երկրի արեւելքում շփման գծի երկայնքով հրադադարի ռեժիմի հաճախակի խախտումներով, խորհուրդ է տրվում բարձր զգոնություն ցուցաբերել և չայցելելել երկրի հյուսիսային և արևելյան սահմանամերձ շրջաններ»,- ТАСС-ի փոխանցմամբ՝ ասված է ԱԳՆ-ի կայքում:
Վերջին օրերին իրավիճակը Դոնբասում կտրուկ սրվել է։ Դոնեցկի և Լուգանսկի ժողովրդական հանրապետություններում փետրվարի 17-ից հայտնում են վերջին ամիսների ընթացքում Ուկրաինայի կողմից ամենաինտենսիվ գնդակոծությունների մասին, որոնք հանգեցրել են քաղաքացիական ենթակառուցվածքների մի շարք օբյեկտների վնասմանը: Զոհվածների մասին տեղեկություններ չկան, երկու խաղաղ բնակիչ վիրավորվել է։ Փետրվարի 18-ին Դոնեցկի և Լուգանսկի ինքնահռչակ հանրապետությունների ղեկավարներ Լեոնիդ Պասեչնիկը և Դենիս Պուշիլինը մարտական գործողությունների աճող սպառնալիքի կապակցությամբ հայտարարել են հանրապետությունների բնակիչներին Ռուսաստան տարհանելու մասին: Այսօր հանրապետություններում համընդհանուր մոբիլիզացիա է հայտարարվել։
