06.10.2026 | 15:04
Ադրբեջանը հիմա էլ աղվանա-ուդիական համայնքի ներկայացուցիչների այց է կազմակերպել Արցախի Ծիծեռնավանք
12 կողմ, 7 դեմ. ՇՊՀ-ն նոր ռեկտոր ունի. ՏԵՍԱՆՅՈՒԹ
Հասարակություն
19.02.2022 | 16:20
Շիրակի պետական համալսարանում այսօր կայացավ ռեկտորի թափուր տեղի համար հայտարարված մրցույթը, որի միակ մասնակիցը 3 տարուց ավելի ռեկտորի պաշտոնակատարի պարտականությունները կատարող Երվանդ Սերոբյանն էր։
Հոգաբարձուների խորհրդի նիստը տևեց մոտ երեք ժամ։ Հոգաբարձուների 20 անդամից նիստին ներկա էին 19-ը․ հարգելի պատճառով չէր ներկայացել միայն Գյումրու փոխքաղաքապետ Արթուր Պապիկյանը։ Վերջինս, հոգաբարձուների խորհրդի նախագահ Լևոն Բարսեղյանի պարզաբանմամբ, հիվանդ է։
Հոգաբարձուների անդամներից 12-ը կողմ, 7-ը դեմ քվեարկեցին Երվանդ Սերոբյանին։ Նա ընտրվեց ռեկտոր։
Լրագրողներին տված իր հարցազրույցում Սերոբյանը խոսեց դասախոսների աշխատավարձի բարձրացման, մթնոլորտի բարելավման մասին։
Լրագրողներից մեկի հարցին, թե արժանապատի՞վ է արդյոք բուհի դասախոսների աշխատավարձը և պլանների մեջ կա՞ աշխատավարձի բարձրացում, վերջինս ասաց․ «Լսեցիք, որ իմ ծրագրում տեսանելի ապագայում կա աշխատավարձի բարձրացում, եթե հարցնեք՝ ի՞նչ չափով, բնական է՝ բյուջեն կորոշի և կորոշի հոգաբարձուների խորհրդի հաստատմամբ։ Արժանապատի՞վ է աշխատավարձը, կասեմ՝ անկեղծորեն՝ ոչ»։
Այն հարցին, թե ռեկտորի աշխատավարձը բուհում 700 հազար դրամ է, սա որքանո՞վ է արդարացված դասախոսների ցածր աշխատավարձի ֆոնին, Երվանդ Սերոբյանը պատասխանեց, որ աշխատավարձի չափն ինքը չէ որոշել, երբ ստանձնել է բուհի ռեկտորի ժամանակավոր պաշտոնակատարի պարտականությունները, աշխատավարձի այդ չափը հաստատված է եղել հոգաբարձուների խորհրդով։
Ըստ նրա՝ ինքը ռեկտորի պաշտոնակատարի պարտականությունները ստանձնելիս առաջարկել է նվազեցնել այն, սակայն հոգաբարձուների խորհուրդը չի փոխել։
Հարցին՝ իսկ հիմա, երբ արդեն ռեկտոր եք ընտրվել, կփոխե՞ք, կնազեցնե՞ք վարչական աշխատակիցների աշխատավարձի չափը, Երվանդ Սերոբյանը պատասխանեց, որ վերջիններիս աշխատավարձը ոչ թե պետք է ցածրացնել, այլ պիտի բարձրացնել դասախոսների աշխատավարձը։
Մթնոլորտի հարթեցման առումով նորընտիր ռեկտորն ասաց, որ 3-4 տարվա ընթացքում բավական աշխատանք է արված, այժմ աշխատանքային մթնոլորտ է տիրում բուհում։
«Եթե ձեզ թվում է՝ 450 հոգանոց կոլեկտիվում կառավարչից բոլորը պետք է գոհ լինեն, եթե նման բան լինի, հաջորդ օրն այդ կառավարչին պիտի ուղղակիորեն հանեն աշխատանքից։ Ցանկացած որոշում որոշ մարդկանց կողմից անտարբերությամբ է ընկալվելու, մյուս մասի կողմից ընկալվելու է որպես դժգոհություն, մի մասն էլ կարող է գոհ լինել»,- ասաց Երվանդ Սերոբյանը։
Արմիկ Մովսիսյան
