16.09.2026 | 21:15
Վթար Չարենցավան-Հրազդան ավտոճանապարհին. նախնական տվյալներով՝ կան չորս զոհ, մեկ տուժած
Թշնամին թիրախավորել է Արցախի նախագահի ինստիտուտը, ինչը փաստում է, որ Արցախի պետականությունը վտանգված է. Վրթանես եպիսկոպոս Աբրահամյան
19.02.2022 | 13:28
Արցախի թեմի առաջնորդ Վրթանես եպիսկոպոս Աբրահամյանն անդրադարձել է Արցախի Հանրապետության նախագահ Արայիկ Հարությունյանի դեմ ադրբեջանական իշխանությունների կողմից հնչեցրած սպառնալիքներին:
«Մեզ համար գաղտնիք չէ, որ Ադրբեջանը պարբերաբար շարունակում է և պիտի շարունակի իր այս նենգ, ապակառուցողական քաղաքականությունը: Պատերազմից հետո հատկապես, ո՞վ է տեսել Ադրբեջանից մի կառուցողական խոսք, ամեն ինչ արվում է, որպեսզի Արցախը՝ որպես հայկական, վերացնի:
Եվ պատահական չեն գերիների բանտարկությունը, մշակութային եղեռնը և, վերջապես, պետական, այսպես ասած, կառուցների նկատմամբ տեռորը: Որովհետև ի դեմս Արցախի պետության՝ Սահմանադրությամբ հանդես է գալիս Արցախի նախագահը:
Այս անգամ թշնամին թիրախավորել է Արցախի նախագահի ինստիտուտը, ինչը փաստում է, որ Արցախի պետականությունը բառիս բուն իմաստով վտանգված է: Թիրախավորելով Արցախի Հանրապետության նախագահին՝ Ադրբեջանը թիրախավորում է ողջ արցախցիներիս:
Ես՝ որպես արցախցի, որպես հայ, որպես հոգևորական, դատապարտում եմ Ադրբեջանի ապակառուցողական որոշումները: Ի գիտություն Ադրբեջանի՝ արցախցիներս կանգնած ենք մեր նախագահի կողքին և պատրաստ ենք ապահովել մեր նախագահի անվտանգությունը»,- ասված է Արցախի թեմի առաջնորդի խոսքում:
Ավելի վաղ հայտնել էինք՝ Ադրբեջանի դատախազությունը խոստացել է ձերբակալել Արցախի նախագահին:
