08.06.2026 | 21:09
Այսօր Երկրին կարող է հարվածել ուժեղ՝ G3 մակարդակի մագնիսական փոթորիկ. Ազիզյան
Ռուսական 14 ընկերություն դիմել է Բաքվին՝ Արցախի գրավյալ տարածքներում գործունեության համար
Քաղաքականություն
17.02.2022 | 13:33
Ռուսական 14 ընկերություն հայտ է ներկայացրել Ադրբեջանին՝ Արցախի գրավյալ տարածքներում գործունեություն ծավալելու համար։ Այս մասին հայտարարել է Ադրբեջանի փոխվարչապետ Շահին Մուսթաֆաևը ՌԴ փոխվարչապետ Ալեքսեյ Օվերչուկի հետ տեսակապով կայացած հանդիպմանը, գրում են ադրբեջանական լրատվամիջոցները։
Նշվել է, որ ռուսական ընկերությունների համար կան բարենպաստ պայմաններ՝ մասնակցելու Ադրբեջանի արդյունաբերական պարկերում իրականացվող նախագծերին։
Բացի այդ, կողմերը քննարկել են առևտրատնտեսական համագործակցությանը վերաբերող հարցերի լայն շրջանակ՝ հատուկ ուշադրություն դարձնելով արդյունաբերությանը, էներգետիկային, տրանսպորտին, գյուղատնտեսությանն ու սննդի անվտանգությանը, ֆինանսաբանկային և միջտարածաշրջանային համագործակցությանը։
Հանդիպման մասնակիցները կարևորել են միջտարածաշրջանային համագործակցության զարգացումը։ Ռուս-ադրբեջանական միջտարածաշրջանային ֆորումի ձևաչափը դիտարկվել է որպես այդ մակարդակի երկխոսության առանցքային հարթակ: 11-րդ միջտարածաշրջանային ֆորումը նախատեսվում է անցկացնել 2022 թվականին։
Էներգետիկայի ոլորտում համագործակցության հարցերում կողմերը նշել են նավթագազային և վերականգնվող էներգիայի ոլորտներում հետագա համագործակցության մեծ ներուժը։ Տրանսպորտի ոլորտում համագործակցությունը քննարկելիս հատուկ ուշադրություն է դարձվել «Հյուսիս-Հարավ» միջազգային տրանսպորտային միջանցքի նախագծի մշակմանը։ Կողմերը դիտարկել են նաև համագործակցության զարգացման հարցերը գյուղատնտեսության ու պարենային անվտանգության ոլորտում։
Նշվում է նաև, որ կողմերը հաստատել են իրենց պատրաստակամությունը՝ շարունակելու կառուցողական երկխոսությունը՝ ուղղված բոլոր ոլորտներում ռուս-ադրբեջանական համագործակցության ամրապնդմանը։
Էմմա Չոբանյան
