Էրդողանը զիջում է դիրքերը․ ըստ նոր հարցման՝ Թուրքիայում ընտրողների կեսն աջակցում է ընդդիմադիր դաշինքին 

Թուրքիայում առաջատար MetroPoll ընկերության կողմից անցկացված նոր սոցհարցման համաձայն՝ ընտրողների 49,7 տոկոսն ասել է, որ «ավելի մոտ է զգում իրեն» երկրի ընդդիմադիր դաշինքին կամ նրանց «նախընտրում» է Թուրքիայի նախագահ Ռեջեփ Թայիփ Էրդողանի իշխող դաշինքին։ Այս մասին գրում են թուրքական լրատվամիջոցները։ 

Հետազոտության արդյունքները, որն անցկացվել է հունվարի 8-12-ը երկրի 28 նահանգում, հրապարակել է MetroPoll-ի ղեկավար Օզեր Սենջարը։ 

Արդյունքների համաձայն՝ հարցման մասնակիցների 49,7 տոկոսը նշել է, որ իրեն ավելի մոտ է զգում ընդդիմադիր «Ազգային դաշինքին», որը կազմված է ընդդիմադիր Ժողովրդահանրապետական և ազգայնական «Լավ» (IYI) կուսակցություններից։  Մասնակիցների 40 տոկոսն էլ ասել է, որ ավելի մոտ է զգում նախագահ Ռեջեփ Թայիփ Էրդողանի «Ժողովուրդների դաշինքին», որը ներառում է իշխող «Արդարություն և զարգացում» և «Ազգայնական շարժում» կուսակցությունները։

MetroPoll-ը նշում է, որ ընդդիմադիր «Ազգային դաշինքին» համազգային աջակցությունն աճել է՝ հասնելով 49,7 տոկոսի, մինչդեռ «Ժողովուրդների դաշինքին» աջակցությունը 42,1 տոկոս է։ 

Սենջարը թվիթերյան գրառման մեջ նշել է, որ այս տվյալները չեն արտացոլում էլեկտրաէներգիայի ու բնական գազի թանկացումների հետևանքով մարդկանց վրա ավելացած ճնշումը։ Նա հավելել է, որ դա պարզ կլինի փետրվարյան  հարցումների արդյունքներով։

Նշենք, որ հունվարի 1-ից Թուրքիայում բնակիչ բաժանորդների և արտադրողների համար էլեկտրաէներգիայի սակագները բարձրացել են 50-125 տոկոսով։ Երկրի տարբեր քաղաքներում պարբերաբար բողոքի ակցիաներ են անցկացվում թանկացումների դեմ։

Էմմա Չոբանյան