21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Թուրքիայում 14-րդ օրն է՝ սննդի առաքիչները գործադուլ են իրականացնում․ տնտեսական ճգնաժամի սոցիալական հետևանքները
Քաղաքականություն
14.02.2022 | 23:30
Թուրքիայի Yemeksepeti սննդի առցանց առաքման հարթակի աշխատակիցները արդեն 14-րդ օրն է՝ գործադուլ են իրականացնում, գրում է Duvar-ը։
Առաքիչները փետրվարի 1-ից են սկսել գործադուլը՝ աշխատավարձերի ոչ համարժեք բարձրացման և աշխատանքային վատ պայմանների պատճառով։ Այսօր նրանք կրկին բողոքի ակցիայի են հավաքվել Ստամբուլի Շիշլի թաղամասում գտնվող ընկերության կենտրոնակայանի դիմաց։ Նրանք նշել են, որ ընկերությունն այս տարի 32,7 տոկոսով ավելացրել է իրենց ամսական եկամուտը՝ հասցնելով 3200 լիրայի, ինչը համապատասխանում է նվազագույն աշխատավարձին։ Աշխատողները, սակայն, պահանջում են ամսական 5500 լիրա (405 դոլար)։
Բեռնափոխադրողների աշխատողների արհմիության ղեկավար Ալի Ռըզա Քյուչուքօսմանօղլուն ակցիայի ընթացքում հայտարարել է, որ ոչ միայն Yemeksepeti-ի, այլև ամբողջ Թուրքիայի առաքիչները վերջին երկու շաբաթվա ընթացքում դիմադրում են գործատու ընկերությունների շահագործման քաղաքականությանը։
«Բոյկոտի կոչն արձագանք է գտել մեր հասարակության մեջ»,- ասել է նա՝ հավելելով, որ բոյկոտի հանրային կոչից հետո պատվերները 70 տոկոսով նվազել են։
Հավելենք, որ Թուրքիայում տնտեսական ճգնաժամն ու բարձր գնաճն աննախադեպ սոցիալական լարվածություն են առաջացրել։ Այս ամենի հետևանքով պարբերաբար բողոքի տարբեր ակցիաներ, հանրահավաքներ են անցկացվում Թուրքիայի տարբեր շրջաններում։
Էմմա Չոբանյան
