14.05.2026 | 22:11
Ռուսական ինքնաթիռի կողմից նետված ավիառումբն է հանգեցրել Բելգորոդի մարզում գնացքի ռելսերից դուրս գալուն. աղբյուր
Էրդողանը մեկնում է ԱՄԷ․ նախատեսվում է երկրների միջև 12 փաստաթղթի ստորագրում
Քաղաքականություն
14.02.2022 | 17:01
Թուրքիայի նախագահ Ռեջեփ Թայիփ Էրդողանի՝ փետրվարի 14-15-ը Արաբական Միացյալ Էմիրություններ կատարելիք երկօրյա պաշտոնական այցի շրջանակում նախատեսվում է միջկառավարական համաձայնագրերի փաթեթ ստորագրել։ Այս մասին գրում է «Անադոլու» գործակալությունը։
Աղբյուրի տվյալներով՝ կողմերը ստորագրման համար համաձայնեցրել են փաստաթուղթ՝ ուղղված առևտրի, պաշտպանության, տրանսպորտի, ներդրումային, ինչպես նաև առողջապահության, գյուղատնտեսության և տեղեկատվական ոլորտներում համագործակցության խորացմանը։ Փաստաթղթերի ստորագրման արարողությունը տեղի է ունենալու Թուրքիայի նախագահ Ռեջեփ Թայիփ Էրդողանի և Աբու Դաբիի թագաժառանգ շեյխ Մուհամեդ բեն Զայեդ Ալ-Նահյանի նեղ և ընդլայնված ձևաչափերով բանակցություններից հետո։
Նախատեսվում է նաև պաշտպանության ոլորտում համագործակցության մեկնարկի համար Մտադրությունների նամակ ստորագրել։
Էրդողանն ԱՄԷ մեկնելուց առաջ տեղի ունեցած ճեպազրույցում հայտարարել է, որ հույս ունի վերականգնել հարաբերություններն արաբական այդ երկրի հետ։ Նա նշել է, որ Անկարայի և Աբու Դաբիի միջև համագործակցությունը, ընդհանուր առմամբ, դրական ազդեցություն կունենա տարածաշրջանի վրա։
Ի դեպ, Էրդողանը հայտնել է, որ իր կինը՝ Էմինե Էրդողանը, իրեն չի ուղեկցելու այցի ընթացքում, քանի դեռ կորոնավիրուսից չի ապաքինվել։ Հիշեցնենք՝ փետրվարի 5-ին Թուրքիայի նախագահը հայտարարել էր, որ կնոջ հետ կորոնավիրուսի «օմիկրոն» շտամով են վարակվել։
Էմմա Չոբանյան
