Ադրբեջանը խոչընդոտում է դելիմիտացիայի գործընթացին․ Բայրամովը կրկին հայտարարել է, որ Հայաստանն, իբր, նախապայմաններ է առաջ քաշում

Ադրբեջանի ԱԳ նախարար Ջեյհուն Բայրամովը այսօր  վերահաստատել է, որ Բաքուն չի պատրաստվում կատարել ձեռք բերված պայմանավորվածություններն ու խոչընդոտելու է հայ-ադրբեջանական սահմանի դելիմիտացիայի գործընթացին։ Ինչպես հաղորդում են տեղական լրատվամիջոցները, Բայրամովը Մոլդովայի ԱԳ նախարարի հետ համատեղ մամուլի ասուլիսում կրկին նշել է, որ Ադրբեջանը պատրաստ է սկսել դելիմիտացիայի գործընթացն առանց նախապայմանների, բայց, իբր, Հայաստանն է նախապայմաններ առաջ քաշում դրա մեկնարկի համար։

«Խոսելով Հայաստանի ու Ադրբեջանի միջև   հարաբերությունների կարգավորման մասին, անհրաժեշտ է նախ լուծել սահմանի դելիմիտացիայի ու դեմարկացիայի հարցը։ Ադրբեջանը պատրաստ է հանձնաժողովի գործունեությանը առանց որևէ նախապայմանի, սակայն հայկական կողմը փորձում է նախնական պայմաններ առաջ տանել հանձնաժողովի աշխատանքի մեկնարկի համար։ Նման մոտեցումը չի նպաստում դրական դինամիկային»,-ասել է Բայրամովը։

Նշենք, որ օրեր առաջ էլ Բայրամովը հայտարարել էր, որ  Հայաստանը  «չունի ո՛չ բարոյական, ո՛չ էլ իրավական իրավունք՝ սահմանների դելիմիտացիայի գործընթացի մեկնարկի համար որևէ պայման դնելու»։

Հավելենք, որ ՀՀ ԱԳ նախարար Արարատ Միրզոյանն օրերս  հայտարարել էր, որ Բաքուն բացասական է արձագանքել սահմանի դելիմիտացիայի ու դեմարկացիայի մասին Հայաստանի առաջարկներին։

Ստացվում է, որ Ադրբեջանն իրականում չի ցանկանում կատարել արդեն իսկ ձեռք բերված պայմանավորվածությունները՝ հրաժարվելով իր զորքերը դուրս բերել ՀՀ սուվերեն տարածքից, որտեղ  գտնվում են 2021թ․ մայիսի 12-ից։

Նշենք, որ այս պայմանավորվածությունները ձեռք էին բերվել անցյալ տարվա նոյեմբերի 26-ի Սոչիի և դեկտեմբերի 14-ի Բրյուսելի հանդիպումներում։ Մասնավորապես, զորքերի հետքաշման մասին ասվում է ԵՄ Խորհրդի նախագահ Շառլ Միշելի միջնորդությամբ Հայաստանի և Ադրբեջանի ղեկավարների եռակողմ հանդիպման արդյունքներով հրապարակված եվրոպական կողմի հայտարարության մեջ։

Էմմա Չոբանյան