10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
ՄԻԵԴ դիմելու փոխարեն՝ սկսեցին այլընտրանքային ճամփաները գովել ու մեր հայտարարությունները հերքել. ՄԻՊ. ՏԵՍԱՆՅՈՒԹ
Քաղաքականություն
04.02.2022 | 12:09
«Սյունիքի մարզում ադրբեջանական ներխուժումների ու ճանապարհները փակելու դեպքերով հայկական կողմը կարող էր դիմել ՄԻԵԴ, բայց դրա փոխարեն սկսեցին այլընտրանքային ճանապարհները գովել»,- այս մասին այսօր իր արտահերթ զեկույցի ներկայացման ժամանակ նշեց ՄԻՊ Արման Թաթոյանը։
«Երբ ադրբեջանական զինված ծառայողները փակել էին Գորիս-Կապան ճանապարհը և Կապան-Ճակատեն գյուղերի հատվածները՝ մեր բնակիչներին կանգնեցնելով լրջագույն խնդիրների առաջ, լրիվ հնարավորություններն ու հիմքերը կային, և մենք անհապաղ միջանկյալ միջոցներ կիրառելու և հեռացնելու պահանջով կարող էինք դիմել Մարդու իրավունքների եվրոպական դատարան, էլ չեմ խոսում մյուս մարմինների մասին։
Փոխարենը մեր մոտից պաշտոնական մակարդակով հայտարարություններ սկսվեցին, որ այդ տարածքները ադրբեջանական են, իրենք ներկա են իրենց տարածքներում, մենք ոչինչ անել չենք կարող, որ ճանապարհն անվտանգ է ու խնդիրներ չկան։
Իշխանություններն սկսեցին միանգամից գովերգել այլընտրանքային ճանապարհները, թաքցնել խնդիրները միջազգային հանրության աչքից։
Մարդու իրավունքների պաշտպանը տարածում էր հայտարարություններ, սկսեցին հերքել։
Հետո, եթե մենք դիմեինք ՄԻԵԴ, ադրբեջանական իշխանությունները կբերեին այս բոլոր ապացույցները ու կասեին՝ բայց դուք շատ էլ երջանիկ եք դրանից, ասում եք, որ դրանք մեր տարածքներն են, մենք եկել ու մեր օրինական տարածքներում ենք նստել, այլընտրանքային ճանապարհները սարքում եք, ձեզ համար խնդիրներ չեն առաջանում»,- ասաց Թաթոյանը։
Նրա խոսքով՝ քանի որ ադրբեջանական զինված ծառայողները բացարձակ անօրինական են ներկա այդ բոլոր տարածքներում, հետևաբար մեր զինված ուժերի ծառայությունը բացարձակ լեգիտիմ է, որովհետև նրանք պաշտպանում են բնակչության կենսական իրավունքները, կյանքն ու առողջությունը։
Մանրամասները՝ տեսանյութում:
