20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Երեխային ենթադրաբար բռնության ենթարկելու դեպքը տեղի է ունեցել Երևանի 124 մանկապարտեզում․ հարուցվել է քրեական գործ
Հասարակություն
03.02.2022 | 16:25
Ինչպես տեղեկացրել էինք՝ Ոստիկանությունը երկու օր առաջ Երևանի մանկապարտեզներից մեկում դայակների և դաստիարակների կողմից երեխային բռնության ենթարկելու մասին հաղորդում է ստացել: Այս մասին Factor.am-ին տեղեկացրին ՀՀ ոստիկանության հասարակայնության հետ կապի և լրատվության վարչությունից:
«Ա. Հ.-ն հունվարի 31-ին ոստիկանությանը հաղորդում է տվել, որ 2019թ մարտից մինչև 2021թ հոկտեմբերի 14-ը դուստրը՝ Է. Ու-ն հաճախել է Երևան քաղաքի մանկապարտեզներից մեկը, որտեղ դայակներ Ռ. Ղ.-ն, Ս. Կ.ն և դաստիարակներ Ի. Ա-ն և Ա. Կ.-ն հաշվի առնելով երեխայի հոր պակիստանցի լինելու հանգամանքը՝ պարբերաբար խմբի երեխաների միջոցով խոշտանգումների են ենթարկել վերջինիս: Նշվում է, որ պարանով ձեռքերը և պարանոցը կապելու եղանակով՝ երկաթյա տաք խաղալիքով այրել են երեխայի կրծքավանդակը, հարկադրել են ուտել հող, խոտ, կղանք, ինչի արդյունքում երեխային պատճառվել է ֆիզիկական ցավ և հոգեկան տառապանք»,- տեղեկացրեց Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը։
Դեպքի առիթվ հարուցվել է քրեական գործ՝ Քրեական օրենսգրքի 119-րդ հոդվածի հատկանիշներով՝ ֆիզիկական ուժեղ ցավ կամ հոգեկան ուժեղ տառապանք պատճառելը, որը կուղարկվի քննչական մարմնին՝ հեռագա գործողության։
Factor.am-ին հայտնի դարձավ, որ խոսքը Երևանի Նորք-Մարաշում գտնվող 124 մանկապարտեզի մասին է։ Մենք փորձեցինք կապ հաստատել մանկապարտեզի ղեկավար անձնակազմի հետ, սակայն զանգերն անպատասխան մնացին։
Ռոզա Վարդանյան
