21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Էրդողանը հայտնել է, որ Պուտինը Պեկինում Օլիմպիական խաղերի բացումից հետո Թուրքիա է այցելելու
Քաղաքականություն
03.02.2022 | 14:10
Թուրքիայի նախագահ Ռեջեփ Թայիփ Էրդողանը իր՝ այսօր Ուկրաինա կատարելիք այցը նշանակալի է անվանել։ «Անադոլու»-ի փոխանցմամբ՝ այս մասին նա հայտարարել է Կիև մեկնելուց առաջ կազմակերպված ճեպազրույցում։
«Թուրքիան ուշադրությամբ հետևում է ՌԴ-ի և Ուկրաինայի միջև լարվածությանը։ Անկարան բոլոր հարթակներում հայտարարում է իր ռազմավարական գործընկերոջ՝ Ուկրաինայի տարածքային ամբողջականությանն ու ինքնիշխանությանն աջակցության մասին։ Թուրքիան, որպես Սևծովյան տարածաշրջանի երկիր, հանդես է գալիս տարածաշրջանում խաղաղության օգտին՝ բոլոր երկրներին հանդարտության ու երկխոսության կոչ անելով»,- ասել է Թուրքիայի նախագահը։
Նա նաև հայտնել է, որ ՌԴ նախագահ Վլադիմիր Պուտինը Պեկինում Օլիմպիական խաղերի բացման արարողությանը մասնակցելուց հետո այցելելու է Անկարա։
«Վլադիմիր Զելենսկիի և Վլադիմիր Պուտինի հետ բանակցությունների արդյունքներից հետո իրավիճակը կպարզվի։ Թուրքիան պատրաստ է իր ներդրումն ունենալ տարածաշրջանում լարվածության նվազմանը»,- ասել է Էրդողանը։
Թուրքիայի նախագահը կրկին շեշտել է, որ Անկարայի համար Ղրիմի թաթարների թեման շատ կարևոր է։
Էրդողանը նաև ընդգծել է Ուկրաինայի հետ տնտեսական կապերը զարգացնելու՝ Թուրքիայի պատրաստակամությունը։
«Կիև այցի շրջանակում նախատեսում ենք համաձայնագիր ստորագրել Ազատ առևտրի գոտու մասին, որը թույլ կտա ապրանքաշրջանառությունը հասցնել 10 միլիարդ դոլարի»,- ասել է Թուրքիայի նախագահը։
Հավելենք, որ Էրդողանի՝ Ուկրաինա այցի շրջանակում, ըստ նախնական տեղեկությունների, 12 պայմանագիր է ստորագրվելու։
Էմմա Չոբանյան
