Գյումրին նոր գլխավոր հատակագիծ կունենա․ կհիմնվեն կանաչ տարածքներ

Գյումրու՝ 2005 թվականին հաստատած գլխավոր հատակագիծը կենթարկվի փոփոխության։ Այն կհարմարեցվի այս քաղաքի նոր զարգացող ուղղությանը՝ զբոսաշրջությանը։ Գլխավոր հատակագծի հենակետային նախագիծն արդեն պատրաստ է, այն քննարկումների փուլում է։ Պատվիրատուն ՀՀ կառավարությունն է։

Գյումրու համայնքապետարանը 15 օրվա ընթացքում կուսումնասիրի այն, իր նկատառումները, դիտողությունները կներկայացնի նախագծային կազմակերպությանը՝ « Հայնախագիծ» ինստիտուտին, վերջնականապես մշակելուց հետո կդնեն հանրային քննարկումների, փորձաքննություններ անցնելուց հետո միայն այն կհաստատվի, այս մասին Factor.am-ի հետ զրույցում տեղեկացրեց Գյումրու համայնքապետարանի գլխավոր ճարտարապետ Հենրիկ Գասպարյանը։ Ըստ նրա՝ գլխավոր հատկագծերը հավերժ չեն․ 15-20 տարին մեկ վերանայվում են։

«Վերանայելը հիմնականում կապված է այն հանգամանքի հետ, որ շատ դրույթներ, որոնք նախատեսված են գլխավոր հատակագծով, չեն իրագործվում տարբեր պատճառներով։ Մանավանդ հիմա, երբ տնտեսությունը պլանավորված չէ, ճկուն մոտեցում պետք է ցույց տալ, և այն դրույթները, որոնք հնարավոր չեն իրագործել թե՛ տեխնիկապես, և թե՛ նպատակահարմար չլինելու պատճառով, դրանք փոխվում են՝ կապված քաղաքի զարգացման հետ։ Նայում ենք, թե տվյալ ժամանակահատվածում քաղաքն ինչ զարգացում է որդեգրում, ինչ ուղղությամբ է զարգանալու»,-ասաց Հենրիկ Գասպարյանը։

Մեր ճշտող հարցին, թե գլխավոր հատակագծի փոփոխման արդյունքում հնարավո՞ր է կանաչ գոտիներն ազատել ապօրինի կառույցներից, Հենրիկ Գասպարյանը պատասխանեց․

«Հիմնական մեխը հենց դա է․ կանաչ գոտիների ծրագիրը ձախողվեց, որովհետև կային օբյեկտիվ և սուբյեկտիվ պատճառներ։ Կանաչ գոտիները, որտեղ երկրաշարժից հետո տնակային ավաններ էին տեղադրվել և նախատեսում էինք դրանք հեռացնել ու ազատել, չկարողացանք։ Շինարարության տեմպերը շատ ցածր էին, պետությունը չկարողացավ մարդկանց ապահովել բնակարանով, ու ամեն մեկը իր տնակի տեղը կապիտալ շինարարություն սկսեց։

Եվ հիմա դրանք քանդելը ոչ մի տեսակետից արդարացված չի կարող լինել , հատկապես որ մեր քաղաքն անօթևանության խնդիր ունի։
Դրա համար այն տարածքները, որոնք անվերադարձ կորսված են որպես կանաչ գոտիներ, փորձում ենք այլ տարածքներում ստեղծել այդ բոլորը։

Մենք կանաչ տարածքներն հիմնականում ստեղծելու ենք «Մայր Հայաստան»-ի Չեքեզի ձորի և Վարդբաղի տարածքներում։ Քաղաքի տարբեր հատվածներում կունենանք փոքրաթիվ պուրակներ, մանկական հրապարակներ։

Կփոխվեն նաև արտադրական գոտիները, քաղաքում շատ ունենք արտադրական այդպիսի տարածքներ՝ և՛ ծայրամասերում կան, և՛ կենտրոնական հատվածում։

Մենք մտածում ենք, որ հատկապես կենտրոնական հատվածում, որտեղ ասենք Տեքստիլ գործարանն է եղել, վերափոխենք որպես բնակելի և ընդհանուր օգտագործման տարածքների»,-մանրամասնեց գլխավոր ճարտարապետը։

Արմիկ Մովսիսյան