19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
ԲԴԽ-ն քննում է դատավոր Բախշիյանին ազատությունից զրկելուն համաձայնություն տալու միջնորդությունը
Հասարակություն
31.01.2022 | 18:36
Factor.am-ի տեղեկություններով՝ Բարձրագույն դատական խորհրդի դռնփակ նիստում այս պահին ընթանում է Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու միջնորդությունների քննությունը: Դրանք ներկայացվել են ՀՀ գլխավոր դատախազ Արթուր Դավթյանի կողմից։
«Քրեական վարույթի շրջանակում դատավորի նկատմամբ գործողությունները կատարվում են՝ առավելագույնս ապահովելով մինչդատական քրեական վարույթի գաղտնիությունը, դատավորի հեղինակության ու անկախության նկատմամբ հարգանքը, բացառելով դատավորի գործունեությանը ուղղակի կամ անուղղակի որևէ միջամտություն, քրեական գործի վերաբերյալ լրացուցիչ որևէ տեղեկատվություն չի կարող տրամադրվել: Ավելորդ շահարկումների տեղիք չտալու համար ընդամենը կարող եմ նշել, որ քրեական գործի շրջանակներում քննության առարկա հանգամանքներն ու փաստերը որևէ կապ չունեն Աշոտ Մինասյանի գործի հետ և վերաբերում են նշված դատավորի գործունեության հետ կապված՝ շատ ավելի վաղ կատարված դեպքին և շատ ավելի վաղ արված բացահայտումներին»,- Factor.am-ի հետ զրույցում պարզաբանեց գլխավոր դատախազի խորհրդական Գոռ Աբրահամյանը։
Նշենք՝ ժամեր առաջ Դատավորների միությունը հայտարարություն էր տարածել այն մասին, որ «իշխանությունները քրեական հետապնդում են սկսել դատավոր Բախշիյանի նկատմամբ, քանի որ նա ոչ իշխանահաճո որոշումներ է կայացրել»։
Ըստ ամենայնի, Միությունը նկատի է ունեցել «Սիսական» ջոկատի հրամանատար Աշոտ Մինասյանի, Քաջարանի համայնքապետ Մանվել Փարամազյանի և Գորիսի փոխքաղաքապետ Մենուա Հովսեփյանի նկատմամբ ընտրված խափանման միջոցը փոխելու և նրանց ազատ արձակելու՝ դատավոր Բախշիյանի որոշումները։
Ռոզա Վարդանյան
