29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Էրդողանը պատրաստվում է ևս 4 նախարարից ազատվել․ նրանց թվում է ԱԳ նախարար Մևլութ Չավուշօղլուն․ լրատվամիջոց
Քաղաքականություն
31.01.2022 | 18:51
Թուրքիայի նախագահ Ռեջեփ Թայիփ Էրդողանը նոր փոփոխություններ է պատրաստվում անել կառավարության կազմում։ Թուրքական Cumhuriyet-ը գրում է, որ Էրդողանը կարող է զբաղեցրած պաշտոններից հեռացնել ևս 4 նախարարի՝ այն բանից հետո, երբ օրերս արդարադատության նախարար Աբդուլհամիտ Գյուլը հրաժարական տվեց։
Էրդողանը կարող է հեռացնել ԱԳ նախարար Մևլութ Չավուշօղլուին, մշակույթի նախարար Մեհմետ Նուրի Էրսոյին, առողջապահության նախարար Ֆահրեթթին Քոջային և գյուղատնտեսության նախարար Բեքիր Փաքդեմիրլիին։
Նշվում է, որ ամենանշանակալին կլինի Չավուշօղլուի հնարավոր փոփոխությունը, որին կարող է փոխարինել նախագահի խոսնակ Իբրահիմ Քալընը։
Չավուշօղուի հնարավոր պաշտոնանկության մասին վերջին շրջանում թուրքական մամուլը հաճախ է գրում։ Իսկ Փաքդեմիրլին Էրդողանի բարեհաճությունը կորցրել է անցյալ ամռանն անտառային հրդեհների հետ կապված խնդիրների պատճառով։
Գյուլի հրաժարականը դիտվում է որպես իսլամիստ-պահպանողական ավանդույթի հետագա խախտում։ Նախկին նախարարը մտերիմ էր իշխող է «Արդարություն և զարգացում» կուսակցության փոխնախագահ Նուման Քուրթուլմուշի հետ։
Ըստ թուրքական պարբերականի՝ Գյուլի հրաժարականը նշան է այն բանի, որ ներկուսակցական վեճերում Էրդողանը նախկին վարչապետ Բինալի Յըլդըրըմի կողմում է։ Նախկին նախարարը նաև խնդիրներ է ունեցել ՆԳ նախարար Սուլեյման Սոյլուի հետ և նախկինում դեմ է եղել Էրդողանի հրամաններին։ Նախագահը նաև գոհ չի եղել դատավորների և դատախազների դեմ Գյուլի գործողություններից, որոնք, ենթադրաբար, կապված են 2016-ի անհաջող հեղաշրջման փորձի հետ։
Լրատվամիջոցը գրում է, որ իշխող կուսակցությունում լարվածության աճի ևս մեկ պատճառ է աջ ծայրահեղական «Ազգայնական շարժում» կուսակցության հետ գործարքը, ըստ որի՝ նրանց երկու տեղ է խոստացվել Դատավորների ու դատախազների խորհրդում, սակայն տրվել է միայն մեկը։
Էմմա Չոբանյան
