Ադրբեջանը հետախուզում է հայտարարել Ալիևին քննադատող ընդդիմադիր բլոգերի և լրագրողի նկատմամբ

Բաքվի ոստիկանության գլխավոր վարչությունը հետախուզում է հայտարարել Եվրոպայում բնակվող ադրբեջանցի ընդդիմադիր բլոգեր Թուրալ Սադըղլիի և լրագրող Ֆիքրեթ Հուսեյնլիի նկատմամբ, գրում են ադրբեջանական լրատվամիջոցները։

Ըստ հաղորդագրության՝ Սադըղլիի նկատմամբ քրեական գործ է հարուցվել «կազմակերպված խմբի կողմից կատարված խարդախության», Հուսեյնլիի դեմ՝ «կազմակերպված խմբի կողմից խարդախության, ապօրինի միգրացիայի կազմակերպման, կեղծ փաստաթղթերի պատրաստման, վաճառքի կամ օգտագործման» հոդվածներով։

«Azad Söz» կայքի գլխավոր խմբագիր Թուրալ Սադըղլին բնակվում է Գերմանիայում։ Ֆիքրեթ Հուսեյնլին էլ, որը 2006 թվականին համագործակցել է ընդդիադիր «Azadliq» պարբերականի հետ և ծեծի ենթարկվել, դրանից հետո լքել է Ադրբեջանը։ 2008-ին նա քաղաքական ապաստան է ստացել Նիդերլանդներում, իսկ 2015-ին դարձել այդ երկրի քաղաքացի։

Նշենք, որ ավելի վաղ Թուրալ Սադըղլին հայտարարել էր, թե առաջին անգամ չէ, որ իր նկատմամբ միջազգային հետախուզում են հայտարարում։

«2019-ին իմ դեմ Բաքվում քրեական գործ էր հարուցվել։ Ինձ ասացին, որ ես Ինտերպոլի ցուցակում եմ, մի փոքր զարմացած էի»,- ասել էր նա։

Սադըղլին հայտարարել է, որ ինքը Ադրբեջանի կառավարության կողմից մեղադրվում և հետապնդվում է Azad Söz-ում իր գործունեության պատճառով։

Հավելենք, որ նա պարբերաբար տարբեր բացահայտումներ է անում Ադրբեջանի նախագահ Իլհամ Ալիևի, նրա ընտանիքի անդամների և ադրբեջանցի տարբեր պաշտոնյաների ապօրինությունների մասով։ Ի դեպ, երբ վերջերս միջազգային լրագրողական հետաքննության արդյունքում պարզվել էր, որ նախագահ Ալիևն ու նրա ընտանիքի անդամները կոռուպցիոն սխեմաներով բազմամիլիոնանոց անշարժ գույք են ձեռք բերել Լոնդոնում, Սադըղլին նկարահանումներ էր արել Մեծ Բրիտանիայի մայրաքաղաքում՝ ցուցադրելով Ալիևների անշարժ գույքը։

Էմմա Չոբանյան