09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Georgian Airways-ը չեղարկել է Թբիլիսի-Մոսկվա չվերթը. այն իրականացվել է Երևանում միջանկյալ վայրէջքով
Քաղաքականություն
28.01.2022 | 17:10
Թբիլիսի-Մոսկվա-Թբիլիսի չվերթը չեղարկելու մասին որոշումը Georgian Airways-ն ինքնուրույն է կայացրել։ Այս մասին ասվում է ՌԴ օդային տրանսպորտի դաշնային գործակալության հայտարարության մեջ, գրում է Նովոստի գրուզիան։
Վրաստանի և Ռուսաստանի միջև ուղիղ չվերթների բացակայության պայմաններում Georgian Airways-ը հունվարի 28-ին Թբիլիսիից Մոսկվա և հակառակ ուղղությամբ չարտերային չվերթ իրականացնելու թույլտվություն է ստացել։ Բոլոր տոմսերը սպառված էին, բայց այսօր ուղիղ չվերթ չի իրականացվել․ օդանավը Մոսկվա է հասել Երևանում միջանկյալ վայրէջքով։
«Georgian Airways-ի՝ Թբիլիսի-Մոսկվա-Թբիլիսի երթուղով 2022 թվականի հունվարի 28-ին չարտերային չվերթ իրականացնելու թույլտվությունը տրվել է Օդային տրանսպորտի դաշնային գործակալության կողմից, և այն չեղարկվել է։ Չվերթը չեղարկելու որոշումը կայացրել է հենց ավիաընկերությունը»,- ասվում է հաղորդագրությունում։
Ավելի վաղ ավիաընկերության հիմնադիր Թամազ Գաիաշվիլին Mtavari հեռուստաալիքին տված մեկնաբանությունում ասել էր, որ իրենք չվերթն իրականացնելու թույլտվություն չեն ստացել «լրատվամիջոցներում բարձրացված աղմուկի» և մի շարք պարտավորություններ չկատարելու պատճառով։
Ռուսաստանը 2019 թվականի ամռանն արգելել է ուղիղ չվերթները դեպի Վրաստան՝ ի պատասխան Պետդումայի պատգամավոր Սերգեյ Գավրիլովի՝ Վրաստան ժամանման հետ կապված զանգվածային բողոքի։ Անցյալ շաբաթ ՌԴ ԱԳՆ-ն նշել է Վրաստանի և Ռուսաստանի միջև ուղիղ ավիահաղորդակցության վերականգնման պայմանները՝ Վրաստանում իրավիճակի կայունացում, ռուսատյաց արշավի դադարեցում և ՌԴ քաղաքացիների անվտանգության սպառնալիքների վերացում։
Տաթև Ֆռանգյան
