22.04.2026 | 23:30
ՀՀ տարածքում ավտոճանապարհները հիմնականում անցանելի են
Հնարավո՞ր է առանց QR կոդի կինո ու թատրոն գնալ․ Factor.TV-ի էքսպերիմենտը․ ՏԵՍԱՆՅՈւԹ
27.01.2022 | 21:42
Արդեն շուրջ 1 շաբաթ է` Հայաստանում սահմանափակումներ են գործում մշակութային հաստատություններ մուտք գործելու համար: Համերգասրահներ, թատրոններ, կինոթատրոններ քաղաքացիների մուտքը հնարավոր է միայն կորոնավիրուսի դեմ պատվաստման հավաստագրով կամ ՊՇՌ թեստի բացասական արդյունքով: Ուշագրավ է, որ չնայած վերջին օրերին կորոնովիրուսով վարակվածների թիվն աճել է, նոր խստացումները չեն վերաբերում ամենամարդաշատ վայրերին՝ մոլերին ու հանրային տրանսպորտին։ Փոխարենը այսպես ասած «թիրախում» են հայտնվել մշակութային օջախները։
Երևանի պետական տիկնիկային թատրոնի գեղարվեստական ղեկավար Ռուբեն Բաբայանը նշում է, որ նոր խստացումներից իրենց թատրոնն արդեն իսկ զգալիորեն տուժել է․ «Նոր խստացումներից հետո մեր հանդիսատեսի քանակը կրճատվել է 3-4 անգամ, մինչդեռ տոմսերի վաճառքից գոյանում են աշխատավարձի, կոմունալ վճարների, գույքի, բեմադրական աշխատանքների համար անհրաժեշտ ծախսերը»։
«Մոսկվա» կինոթատրոնի մարքեթինգի գծով փոխտնօրեն Անահիտ Խաչատրյանը ևս փաստում է, որ նոր խստացումների պատճառով տոմսերը սկսել են զգալիորեն քիչ սպառվել․ «Խստացումների առաջին իսկ օրվանից նկատեցինք հանդիսատեսի թվի կտրուկ նվազում։ Լինում էին դեպքեր, երբ խմբերով գալիս էին մարդիկ, որոնք նոր էին տեղեկանում խստացումների մասին և հետ էին դառնում»։
Ռուբեն Բաբայանի խոսքով՝ թատրոնները դիտարկվում են որպես վարակի տարածման օջախներ, սակայն ամբողջ աշխարհում կա հայտնի վիճակագրություն՝ թատրոն է այցելում յուրաքանչյուր երկրի բնակչության 4-8տոկոսը, ամեն թատերասեր թատրոն է այցելում տարեկան 3-4 անգամ։
Օրեր առաջ կառավարության նիստում խոսելով նոր խստացումներից՝ վարչապետ Նիկոլ Փաշինյանը նշեց, որ նման քաղաքականություն են վարում, որպեսզի ստիպված չլինեն նոր լոքդաունների անցնել, և բիզնեսը կրկին չտուժի։ Չնայած այս հանգամանքին՝ էկոնոմիկայի նախարար Վահան Քերոբյանը խոստովանեց, որ որոշումը բացասաբար է անդրադարձել ռեստորանային բիզնեսի վրա՝ վաճառքի ծավալները նվազեցնելով շուրջ 20 տոկոսով։
Մանրամասները՝ տեսանյութում։
Աննա Բաբաջանյան
