Հայաստանում 1 շաբաթում 4-5 անգամ աճել է կորոնավիրուսով օրական վարակվողների թիվը։ Սկսվել է վարակի հինգերորդ ալիքը, որն ավելի արագ է տարածվում։ Միայն այսօր վարակը հաստատվել է 1930 հոգու մոտ․ նրանցից մեկը վարչապետ Փաշինյանն է։ Նա հիվանդությունը տանում է առանց ախտանշանների, բայց ինքնամեկուսացած է։
Վարակման այսօրվա ցուցանիշը մոտենում է չորրորդ ալիքի պիկին։ Այդ ալիքը Հայաստանում գրանցվեց աշնանը, երբ տարածվում էր մահաբեր «դելտա» շտամը։ Առողջապահության նախկին նախարար, ԱԺ «Քաղաքացիական պայմանագիր» խմբակցության պատգամավոր Արսեն Թորոսյանը Factor TV-ի հետ զրույցում նշում է, որ նոր ալիքը կանխատեսում էին հենց հունվարի վերջին։
Թորոսյանը նշում է՝ ոչ ոք երաշխիք չունի, որ «օմիկրոն» շտամն իր համար մահացու չի լինի։ Ավելին, մահվան դեպքերի քիչ լինելն ունի մեկ այլ պատճառ։
«Մահվան դեպքերը միշտ 2-3 շաբաթ հետ են ընկնում հիմնական թվերի աճից, այդ թվում՝ մյուս ալիքների ժամանակ, որովհետև, դժբախտաբար, մահանում են այն քաղաքացիները, որոնք երկարատև բուժում են ստանում հիվանդանոցներում, վերակենդանացման բաժանմունքներում և, դժբախտաբար, ոչ բոլորի կյանքն է ստացվում փրկել։ Եվ վերակենդանացման բաժիններում մնալու այդ միջին տևողությունը մոտ 2-3 շաբաթ է»,- բացատրում է Թորոսյանը։
Tvyal.com հետազոտական կենտրոնի ղեկավար Աղասի Թավադյանն ուսումնասիրել է «օմիկրոնի» տարածման տեմպերը տարբեր երկրներում։ Նա նշում է, որ թեև «օմիկրոն» շտամից մահվան դեպքերը մոտ 3-4 անգամ ավելի քիչ են, քան նախորդ ալիքների դեպքում, սակայն վարակումները 3-4 անգամ շատ են լինելու, հետևաբար՝ մահվան դեպքերը կարող են հասնել նախորդ ալիքների ցուցանիշներին։
««Օմիկրոնը» բավականին արագ տարածվող շտամ է, և ըստ իմ կանխատեսման՝ մենք գագաթին պետք է հասնենք մոտակա 30-40 օրերի ընթացքում, որից հետո սկսելու է իջնել»,- նշում է Թավադյանը։
Վերլուծաբանը զգուշացնում է, որ նույնիսկ այս ալիքի ավարտից հետո էլ կորոնավիրուսը չի վերանալու։ Ըստ վերլուծաբանի՝ սպասվում է նաև 6-րդ ալիք։
Այն, որ այս ալիքով կորոնավիրուսային համաճարակը կարող է ավարտվել, բավական տարածված միֆ է։ Դրան այսօր անդրադարձել է նույնիսկ Առողջապահության համաշխարհային կազմակերպության գլխավոր տնօրեն Թեդրոս Գեբրեյեսուսը։
«Վտանգավոր է կարծել, թե «օմիկրոնը» լինելու է կորոնավիրոսի վերջին տարբերակը, կամ որ մենք մոտենում ենք համավարակի ավարտին։ Ընդհակառակը, գլոբալ իմաստով իդեալական պայմաններ կան նոր տարբերակների հայտնվելու համար», – նշել է Գեբրեյեսուսը։
Այս իմաստով Հայաստանում անելիքներն ավելի շատ են․ աշխարհի առաջատար երկրներում կորոնավիրուսի դեմ պատվաստվածների թիվը հասնում է ավելի քան 90 տոկոսի։ Հայաստանում երկու դեղաչափ պատվաստում ստացել է բնակչության 27-28 տոկոսը։
Մանրամասները՝ տեսանյութում։
Գարիկ Հարությունյան
